(អង់គ្លេស)៖ កាលពីថ្ងៃច័ន្ទម្សិលមិញនេះ រដ្ឋាភិបាលចក្រភពអង់គ្លេសគ្រោងនឹងអនុវត្តការបិទទីក្រុងទាំងមូលនៅទូទាំងភាគខាងជើងរបស់ខ្លួន និងទីក្រុងឡុងដើម្បីប្រយុទ្ធប្រឆាំងនឹងរលកទី២ ដែលមានអត្រាឆ្លងខ្ពស់នៃជំងឺកូវីដ១៩។ នេះបើតាមការចេញផ្សាយដោយសារព័ត៌មាន រ៉យទ័រ នៅថ្ងៃអង្គារ ទី ២៩ ខែកញ្ញា ឆ្នាំ២០២០។
រដ្ឋមន្រ្តីក្រសួងសុខាភិបាលអង់គ្លេស លោកMatt Hancock បាននិយាយថា “ជាអកុសលចំនួនករណីនៅតែបន្តកើនឡើងយ៉ាងខ្លាំង វិធានតឹងរឹងថ្មីដែលកំពុងត្រូវបានពិចារណានេះ ហាងស្រា,ភោជនីយដ្ឋាន និងបារទាំងអស់នឹងត្រូវបានបញ្ជាឱ្យបិទក្នុងរយៈពេលពីរសប្តាហ៍ដំបូង ហើយមនុស្សដែលមិនគោរពតាមនឹងប្រឈមនឹងការផាកពិន័យតាមច្បាប់ ដោយឡែកសាលារៀន និងកន្លែងធ្វើការនឹងមិនរងផលប៉ះពាល់ពីការដាក់កម្រិតនេះទេ”។
សូមជម្រាបថា នៅដើមសប្តាហ៍នេះនាយករដ្ឋមន្រ្តីអង់គ្លេស ក៏បាននិយាយថាការបិទប្រទេសជាថ្មីអាចនឹងគំរាមកំហែងដល់ការងារ ជីវភាពរស់នៅនិងទំនាក់ទំនងរបស់ប្រជាជនផងដែរ។ គិតត្រឹមថ្ងៃអង្គារនេះ ប្រទេសអង់គ្លេសមានចំនួនអ្នកស្លាប់ខ្ពស់បំផុតដោយសារវីរុសកូវីដ១៩នៅតំបន់អឺរ៉ុបគឺមានចំនួន៤២,០០០នាក់៕
