(ហ្សឺណែល)៖ ប្រធានអង្គការសុខភាពពិភពលោក (WHO) បានពិពណ៌នាអំពីការស្លាប់ចំនួន១លាននាក់ដោយសារជំងឺកូវីដ១៩ គឺជា“ ព្រឹត្តិការណ៍ដ៏គួរឱ្យព្រួយបារម្ភបំផុត” ខណៈការឆ្លងរាតត្បាតនៅតែកើនឡើងនៅទូទាំងពិភពលោក។នេះបើតាមការចេញផ្សាយដោយសារព័ត៌មាន Reuters នៅថ្ងៃពុធ ទី៣០ ខែកញ្ញា ឆ្នាំ២០២០។
អគ្គលេខាធិការអង្គការ(WHO) លោក Antonio Guterres បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា“ ពិភពលោករបស់យើងបានឈានដល់ដំណាក់កាលដ៏គួរឱ្យព្រួយបារម្ភមួយយើងមិនត្រូវភ្លេចអំពីជីវិតរបស់មនុស្សម្នាក់ៗឡើយ ពួកគេជាឪពុកម្តាយភរិយានិងស្វាមីបងប្អូនប្រុសស្រីមិត្តភក្តិនិងមិត្តរួមការងារ” ។
វាចំណាយពេលតែ ៣ ខែប៉ុណ្ណោះសម្រាប់ការស្លាប់ដោយជំងឺកូវីដ១៩ កើនឡើងទ្វេដងពីកន្លះលាននាក់ដែលជាអត្រានៃការស្លាប់ចាប់តាំងពីការស្លាប់លើកដំបូងត្រូវបានកត់ត្រានៅក្នុងប្រទេសចិនកាលពីដើមខែមករា ហើយឥឡូវនេះមនុស្សជាង ៥,៤០០នាក់បានស្លាប់ដោយកូវីដ១៩នៅជុំវិញពិភពលោកនៅរៀងរាល់ ២៤ ម៉ោង។
នៅក្នុងឆ្នាំនេះចំនួនអ្នកស្លាប់ដោយសារមេរោគឆ្លងថ្មីកូវីដ១៩ ឥឡូវមានចំនួនទ្វេដងនៃចំនួនមនុស្សដែលបានស្លាប់ជារៀងរាល់ឆ្នាំដោយសារជំងឺគ្រុនចាញ់ និងអត្រាមរណភាពបានកើនឡើងក្នុងប៉ុន្មានសប្តាហ៍ថ្មីៗនេះ ដោយសារការឆ្លងបានកើនឡើងខ្ពស់ នៅក្នុងប្រទេសជាច្រើននៅលើពិភពលោក។
សូមជម្រាបថា សហរដ្ឋអាមេរិក ប្រេស៊ីល និងឥណ្ឌាមានចំនួនអ្នកស្លាប់ដោយកូវីដ១៩ ជិត៤៥ភាគរយនៃចំនួនអ្នកស្លាប់ទាំងអស់នៅទូទាំងពិភពលោក។ គិតត្រឹមថ្ងៃពុធ ទី៣០ ខែកញ្ញា ឆ្នាំ២០២០នេះ ករណីឆ្លងកូវីដ១៩នៅលើពិភពលោកសរុបមានចំនួន ៣៣,៨៤១,០៩៣នាក់ ជាសះស្បើយចំនួន២៥,១៤៤,៥៧២នាក់ និងស្លាប់ចំនួន ១,០១២,៦០៩នាក់៕
