ភ្នំពេញ ៖ ស្ត្រីអ្នកលក់ផ្កា ម្នាក់ ជិះម៉ូតូបត់មិនប្រយ័ត្នត្រូវរថយន្តដឹកខ្សាច់ បុកពីក្រោយកិនពីលើបណ្ដាលឲ្យស្លាប់ ភ្លាមៗនៅនឹងកន្លែងកើតហេតុ កាលពីម៉ោងជិត១០យប់ថ្ងៃទី៣០ ខែវិច្ឆិកា ឆ្នាំ២០២០ ស្ថិតនៅតាមបណ្ដោយផ្លូវ ២៧១ ក្នុងសង្កាត់ទន្លេបាសាក់ ខណ្ឌចំការមន។
សពជនរងគ្រោះឈ្មោះ ឯម ឡៃ អាយុ៥៥ឆ្នាំ មុខរបរ ដើលក់ផ្កា មានកូន ៤ នាក់ មានស្រុកកំណើត នៅភូមិអង្កាញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ។
ប្រភពព័ត៌មានពីអ្នកស្គាល់ជនរងគ្រោះ បានអោយដឹងថា មុនពេលកើតហេតុជនរងគ្រោះ បានជិះម៉ូតូម៉ាកគុបមូលមួយគ្រឿង មិនមានផ្លាកលេខ ដឹកផ្កាដើរលក់ចេញពីផ្សារដើមគរទៅមុខព្រះបរមរាជវាំង រួចបម្រុងនឹងជិះម៉ូតូវិលត្រឡប់ទៅផ្ទះវិញ ធ្វើដំណើរតាមបណ្តោយផ្លូវ ២៧១ ក្នុងទិសដៅពីកើតមកលិច មកដល់ចំណុចកើតហេតុបម្រុងនឹងបត់ ក៏ត្រូវថយន្តដឹកខ្សាច់មួយគ្រឿងដែលពាក់ផ្លាកលេខ ភ្នំពេញ 3F 0210 ធ្វើដំណើរពីក្រោយក្នុងទិសដៅស្របទិសគ្នា មកបុកពីក្រោយពេញទំហឹង រួចកិនពីខាងលើបណ្តាលឲ្យស្ត្រីម្នាក់ស្លាប់ភ្លាមៗ ចំណែកម៉ូតូវិញជាប់នៅខាងក្រោមរថយន្ត៕
