ខេត្តបន្ទាយមានជ័យ ៖ មន្ត្រីនគរបាលខេត្តបន្ទាយមានជ័យ៣នាក់ ត្រូវបាន ស្នងការនគរបាលខេត្តបន្ទាយមានជ័យ ដកតួនាទីបន្ថយសក្តិ និងពិន័យរដ្ឋបាល ក្រោយពីដកកាំភ្លើង ខ្លីបាញ់២គ្រាប់ នៅក្នុងហាងផឹកស៊ី ក្នុងចំណុចក្នុងភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
អ្នកឃើញហេតុការណ៍ បានអោយដឹងថា ករណីបាញ់បោះសេរីនេះ បង្កឡើងដោយក្រុមអ្នកផឹកស៊ី៣នាក់ ហើយអ្នកបាញ់ជាមន្ត្រីនគរបាល ហើយការបាញ់នេះ មិនមែនផ្តើមឡើងពីជម្លោះក្នុងវង់ផឹកស៊ីនោះទេ គឺផឹកស្រាបៀរស្រវឹងស្រឿងៗបាញ់លេង។
ក្រោយពីមានការផ្ទុះអាវុធ លោកឧត្ដមសេនីយ៍ទោ សិទ្ធ ឡោះ ស្នងការនគរបាលខេត្តបន្ទាយមានជ័យ បានឲ្យដឹងថា នៅព្រឹកថ្ងៃទី១៥ ខែធ្នូ ឆ្នាំ ២០២០នេះ លោកបានបញ្ជាឲ្យដកតួនាទី បន្ថយសក្ដិ និងពិន័យរដ្ឋបាលដល់ មន្ត្រីនគរបាលបីរូប ដែលមានការពាក់ព័ន្ធករណីផ្ទុះអាវុធ២គ្រាប់។
លោកឧត្ដមសេនីយ៍ទោ បានបញ្ជាក់ឲ្យដឹងទៀតថា មន្ត្រីនគរបាល៣ រូប ជនដៃដល់ ក្នុងការផ្ទុះអាវុធមាន ឈ្មោះ ឈឹម អឿត ដែលមានតួនាទីជានាយផ្នែក នៃការិយាល័យសរុបវិភាគ ត្រូវបានដកតួនាទី បន្ថយសក្តិ ពីថ្នាក់វរសេនីយ៍ត្រីមកត្រឹមអនុសេនីយ៍ទោ ឈ្មោះ សៀក ប៊ុនសៀង បន្ថយសក្តិ២មកត្រឹមព្រឹន្ទបាលឯក ចំណែកឈ្មោះ ឧត្តម ឆរ័ត្ន ដែលបានចូលរួមផឹកស៊ីនិងបានដកកាំភ្លើងពីខ្មាន់កាំភ្លើង ត្រូវបានដាក់ពិន័យរដ្ឋបាលបញ្ឈរជើងបីខែ៕
