ញូវយ៉ក៖ កាលពីថ្ងៃពុធម្សិលមិញនេះ បុគ្គលិកសុខាភិបាលអាមេរិកម្នាក់នៅរដ្ឋអាឡាស្កាមានប្រតិកម្មអាឡែហ្ស៊ីធ្ងន់ធ្ងរបន្ទាប់ពីបានចាក់វ៉ាក់សាំងការពារជំងឺ COVID-19របស់ក្រុមហ៊ុន Pfizer Inc។នេះបើតាមការចេញផ្សាយដោយទីភ្នាក់ងារព័ត៌មាន ChannelNewsAsia នៅថ្ងៃព្រហស្បតិ៍ ទី១៧ ខែធ្នូ ឆ្នាំ២០២០។
ការប្រតិកម្មអាឡែហ្ស៊ីវ៉ាក់សាំងនេះ បណ្តាលឲ្យមានអាការៈឡើងកន្ទួលក្រហម និងពិបាកដកដង្ហើម ហើយអាការៈរបស់បុគ្គលិកសុខាភិបាលនោះត្រូវបានគេជួយសង្គ្រោះភ្លាមៗបន្ទាប់ពីត្រូវបានបញ្ជូនទៅមន្ទីរពេទ្យ។ របាយការណ៍ពីក្រុមមន្ត្រីរដ្ឋអាឡាស្កាបាននិយាយថា វាមិនច្បាស់ទេថាតើគាត់ធ្លាប់មានប្រវត្តិប្រតិកម្មអាឡែស៊ីពីមុនឬទេ ហើយគាត់នឹងមិនទទួលការចាក់វ៉ាក់សាំងលើកទី២បាននោះទេ។
សូមជម្រាបថា បន្ទាប់ពីមានករណីនេះកើតឡើង រដ្ឋបាលចំណីអាហារនិងឪសថអាមេរិក នៅតែបន្តអនុញ្ញាត្តឲ្យចែកចាយ និងប្រើប្រាស់វ៉ាក់សាំងរបស់ក្រុមហ៊ុនPfizer-BioNTech ជាមួយនឹងការណែនាំឱ្យមនុស្សដែលធ្លាប់មានប្រវត្តិអាឡែរហ្សីពីមុន ត្រូវពិគ្រោះយោបល់ជាមួយគ្រូពេទ្យដើម្បីប្រាកដថាពួកគេមិនមានអាឡែស៊ីទៅនឹងសមាសធាតុផ្សំនៃវ៉ាក់សាំងPfizer-BioNTechនេះ៕
