ខេត្តបន្ទាយមានជ័យ ៖ ពិតជាក្រុម ទមិឡ ឥតសាសនា មែន! ក្រុមចោរ បាននាំគ្នា ចូលទៅគាស់កុដិព្រះសង្ឃ និងបានលួចយកលុយអស់ជាង១២លានរៀល រួមទាំងលុយថៃ ១ម៉ឺនបាត។ ហេតុការណ៍គាស់កុដិ លួចយកបច័យ នេះ កើតឡើងកាលពីព្រឹក ថ្ងៃទី២៣ ខែធ្នូ ឆ្នាំ២០២០ ស្ថិតនៅ វត្តមុន្នីហែមវ័ន្តប៉ោយចារ ស្ថិតក្នុងភូមិប៉ោយចារ ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។
ព្រះចៅអធិការ ព្រះនាម អ៊ុល ឈី ព្រះជន្ម៧០ព្រះវស្សា គង់នៅវត្តមុន្នីហែមវ័ន្តប៉ោយចារ មានសង្ឃដីការថា នៅពេលកើតហេតុនោះព្រះអង្គបាននិមន្តទៅសាលាឆាន់ ដែលនៅខាងជើងកុដិព្រះអង្គគង់នៅ ប្រហែល១០០ម៉ែត្រ ដោយមុនពេលនិមន្តចេញទៅឆាន់ចង្ហាន់ព្រះអង្គបានបិទទ្វារចាក់សោនិងបិទបង្អួច ពេលឆាន់ចង្ហាន់រួច ព្រះអង្គនិមន្តមកដល់កុដិវិញស្រាប់តែឃើញស្នាមឆ្កឹះសោទ្វារកុដិពេលចូលដល់ក្នុងកុដិឃើញធុង ធ្វើអំពីស័ង្កសី ដែលព្រះអង្គទុកនៅក្រោមគ្រែសឹង្ហរបស់ព្រះអង្គ មានស្នាមវះដោយកាំបិតយកលុយខ្មែអស់ក្នុងកេះដែកនោះចំនួន៩.០០០.០០០រៀល លុយខ្មែរទុកលើគ្រែចំនួន៣.៥០០.០០០រៀល ប្រាក់ថៃចំនួន១០.០០០បាទ ទូរសព្ទដៃ១គ្រឿង។
ព្រះអង្គបានបញ្ជាក់ឲ្យដឹងបន្តទៀតថា មុនពេលព្រះអង្គនិមន្តចេញពីកុដិទៅសាលាឆាន់បានឃើញមនុស្សប្រុសម្នាក់ មិនស្គាល់អត្តសញ្ញាណស្លៀកពាក់ស្អាតបាតអង្គុយលើម៉ូតូនៅខាងលិចកុដិប្រហែល២៥ម៉ែត្រ តែព្រះអង្គមិនបានចាប់អារម្មណ៍ នៅពេលត្រឡប់មកកុដិវិញក៏ឃើញទ្វារកុដិ របើកសោ៕
