ភ្នំពេញ ៖ លោកឧត្តមសេនីយ៍ឯក ឆាយ គឹមខឿន អ្នកនាំពាក្យ នៃអគ្គស្នងការដ្ឋាន នគរបាលជាតិ ថ្លែង ក្នុងរយៈពេល ២៤៥ ថ្ងៃ គិតចាប់ពីថ្ងៃទី១ ខែឧសភា ដល់ថ្ងៃទី៣១ ខែធ្នូ ឆ្នាំ២០២០ មនុស្សចំនួន ១.០២៦ បានស្លាប់ និង ៣.០០៣ នាក់ បានរងរបួស ក្នុងនោះរបួសធ្ងន់ ចំនួន ១.៨២៥ នាក់ នៅក្នុងគ្រោះថ្នាក់ចរាចរណ៍ ទូទាំងប្រទេស ដែលកើតឡើងចំនួន ២.០១៧ លើក។
លោកឧត្តមសេនីយ៍ឯក ឆាយ គឹមខឿន បានបន្តថាៈ លទ្ធផលរឹតបន្តឹងការអនុវត្ត ច្បាប់ចរាចរណ៍ផ្លូវគោក តាមស្មារតីអនុក្រឹត្យ លេខ៣៩ រយៈពេល ២៤៥ថ្ងៃ គិតចាប់ពីថ្ងៃទី១ ខែឧសភា ដល់ថ្ងៃទី៣១ ខែធ្នូ ឆ្នាំ២០២០ យានយន្តដែលត្រូវបានត្រួតពិនិត្យ និងផាកពិន័យ សរុបចំនួន ២៤៩.៣១០គ្រឿង ក្នុងនោះម៉ូតូមានចំនួន ១៨៣.៥៧២ គ្រឿង និងរថយន្ត មានចំនួន ៦៥.៧៣៨ គ្រឿង។
អ្នកនាំពាក្យ អគ្គស្នងការដ្ឋាននគរបាលជាតិ បានបញ្ជាក់ថាៈ បទល្មើសភាគច្រើន សម្រាប់ម៉ូតូ និងរថយន្ត គឺអត់ពាក់មួកសុវត្ថិភាព ល្មើសសញ្ញា បត់ជែង លើសចំណុះ ស្រវឹង អត់ផ្លាកលេខ ល្មើសល្បឿន អត់ប័ណ្ណបើកបរ អត់ខ្សែក្រវ៉ាត់ គ្មានស្លាកលេខ និងនិយាយទូរស័ព្ទ ពេលបើកបរ៕
