អាមេរិក៖ សភាតំណាងរាស្រ្តអាមេរិកដែលគ្រប់គ្រងដោយបក្សប្រជាធិបតេយ្យ បានបញ្ជូនការចោទប្រកាន់អតីតប្រធានាធិបតីដូណាល់ ត្រាំទៅព្រឹទ្ធសភាហើយនៅថ្ងៃទី២៥ មករានេះ(ពេលវេលានៅអាមេរិក) ពីបទញុះញង់ឱ្យអ្នកគាំទ្របះបោរប្រឆាំងរដ្ឋាភិបាលអាមេរិក បន្ទាប់ពីក្រុមអ្នកគាំទ្រលោក ត្រាំ សម្រុកចូលវាយប្រហារវិមានសភាដែលកំពុងប្រជុំប្រកាសទទួលស្គាល់ពីជ័យជម្នះលោកចូ បៃឌិន កាលពីថ្ងៃទី៦ មករាកន្លងទៅ។
សមាជិកសភាបក្សប្រជាធិបតេយ្យចំនួន៩រូប ដើរតួជាអ្នកចោទប្រកាន់អតីតប្រធានាធិបតី ដូណាល់ ត្រាំ ដោយនៅថ្ងៃទី១៣ ខែមករា សភាតំណាងបានអនុម័តច្បាប់ចោទប្រកាន់នេះ ។ និតិវីធីបន្ទាប់គឺព្រឹទ្ធសភាអាមេរិក នឹងត្រូវកាត់ក្តីអតីតប្រធានាធិបតីរូបនេះនៅថ្ងៃទី៩ កុម្ភៈខាងមុខនេះ ខណៈ លោក ត្រាំ ក្លាយជាប្រធានាធិបតីអាមេរិកដំបូងដែលត្រូវសភាចោទប្រកាន់ចំនួនពីរដង ដោយលើកទីមួយនៅខែធ្នូ ឆ្នាំ២០១៩ ប៉ុន្តែត្រូវបានព្រឹទ្ធសភាកាត់ក្តីឱ្យរួចទោសនៅថ្ងៃទី៥ កុម្ភៈ ឆ្នាំ២០២០។
សូមជម្រាបថា បើសិនជាព្រឹទ្ធសភារកឃើញថា អតីតប្រធានាធិបតីរូបនេះមានទោសក្នុងការញុះញង់ បង្ករឲ្យមានការបះបោរប្រឆាំងរដ្ឋាភិបាលមែនលោក ត្រាំ នឹងមិនអាចឈរឈ្មោះបោះឆ្នោតឬកាន់តំណែងជាប្រធានាធិបតីអាមេរិកបានទៀតឡើយ៕
