ខេត្តកំពង់ស្ពឺ ៖ ឈាមស្រែកស្បែកហៅមែន! តាមពិត បុរសជាឃាតកដែលបាន អារ ក សម្លាប់ស្ត្រីចំណាស់ម្នាក់ក្នុងចម្ការស្វាយ នៅឃុំត្រែងត្រយឹង ស្រុកភ្នំស្រួច កាលពីប៉ុន្មានថ្ងៃមុននោះ គឺជាប្តីរបស់ជនរងគ្រោះ ផ្តើមឡើងដោយសារទំនាស់ពាក្យសម្តីគ្នារឿងដែលជនរងគ្រោះជំពាក់លុយធនាគារច្រើនកន្លែង ខ្ចីពីមួយ ទៅសងមួយ មិនសល់លុយទើបឈានទៅដល់ជ្រុលដៃសម្លាប់ជនរងគ្រោះតែម្តង។ ពេលនេះជនសង្ស័យត្រូវបានកម្លាំងនគរបាលព្រហ្មទណ្ឌនៃស្នងការដ្ឋាននគរបាលខេត្តកំពង់ស្ពឺ ចាប់ឃាត់ខ្លួនបានហើយ។
ជនសង្ស័យជាប្តីដែលអារ ក សម្លាប់ប្រពន្ធខ្លួនឯងនោះមានឈ្មោះ ពុធ ថាន អាយុ៧០ឆ្នាំ ស្នាក់នៅក្នុងចម្ការស្វាយ ភូមិព្រៃទទឹង ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ ។
ជនសង្ស័យបានឆ្លើយសារភាពថា មូលហេតុដែលសម្លាប់ប្រពន្ធផ្តើមឡើងដោយសារទំនាស់ពាក្យសម្តីគ្នារឿងប្រពន្ធជំពាក់លុយធនាគារច្រើនកន្លែង គឺខ្ចីពីធនាគារមួយ ទៅសងធនាគារមួយ សងមិនចេះអស់ មិនសល់លុយ ទើបឈានទៅដល់ជ្រុលដៃសម្លាប់ប្រពន្ធតែម្តង។
បច្ចុប្បន្នជនសង្ស័យសមត្ថកិច្ចកំពុងសាកសួរ និងរៀបចំកសាងសំណុំរឿងដើម្បីបញ្ជូនបន្តទៅតុលាការអនុវត្តតាមនិតិវិធីច្បាប់៕