ខេត្តកំពត:កម្លាំងសមត្ថកិច្ចនៃស្នងការនគរបាលខេត្តកំពត កាលពីម៉ោង៩និង៣០នាទីយប់នៅថ្ងៃទី២៣ ខែសីហា ឆ្នាំ២០២១ បានសហការជាមួយកម្លាំងនគរបាល នៃអធិការដ្ឋាននគរបាលក្រុងកំពត បានចុះបង្ក្រាបករណីល្មើសនឹងបំរាមវិធានការរបស់រដ្ឋបាលខេត្តកំពត និងក្រសួងសុខាភិបាល នៅខារ៉ាអូខេ និងភោជនីយដ្ឋានឈ្មោះ (ហាន់នី) ស្ថិតនៅក្នុងភូមិសុវណ្ណសាគរ សង្កាត់កំពង់កណ្តាល ក្រុងកំពត ខេត្តកំពត ដោយបានឃាត់ខ្លួនឈ្មោះ ពៅ ធូ ភេទប្រុស អាយុ៣១ឆ្នាំ ជាអ្នកគ្រប់គ្រង ដែលបានបើកអោយដំណើរការជួបជុំផឹកស៊ី និងច្រៀងខារ៉ាអូខេ ចំនួន២បន្ទប់។
បើតាមការបញ្ជាក់របស់សមត្ថកិច្ចបានឲ្យដឹងថា កម្លាំងនគរបាលបានឃាត់ខ្លួនមនុស្សចំនួន១៧នាក់ (ស្រី ៥នាក់) ក្នុងនោះមានអ្នកគ្រប់គ្រងម្នាក់ សន្តិសុខម្នាក់ នារីអ្នកបំរើខារ៉ាអូខេ៥នាក់ និងភ្ញៀវ១០នាក់ ។
បច្ចុប្បន្ន កម្លាំងជំនាញបាននឹងកំពុងសាកសួរមនុស្សទាំង១៧នាក់នេះ ដើម្បីកសាងសំណុំរឿងចាត់ការបន្តតាមនីតិវិធី។
គួរបញ្ជាក់ផងដែរថា រដ្ឋបាលខេត្តកំពត ក៏ដូចជាក្រសួងសុខាភិបាល បានណែនាំ និងមានបម្រាមវិធានការរដ្ឋបាល បិទការជួបជុំផឹកស៊ី គ្រឿងស្រវឹង ប្រមូលផ្ដុំគ្នា ដែលមានមនុស្សច្រើន ដើម្បីទប់ស្កាត់ការរីករាលដាលនៃជំងឺកូវីដ-១៩ ។ ប៉ុន្តែនៅមានបុគ្គលមួយចំនួន គឃ្លើននឹងច្បាប់ បានប្រមូលផ្ដុំគ្នា មិនព្រមស្ដាប់ចំពោះការណែនាំរបស់អាជ្ញាធររដ្ឋ និងសមត្ថកិច្ចក៏ដូចជាវិធានសុខាភិបាលសោះឡើយ។ ដូច្នេះដើម្បីអនុវត្តវិធានការច្បាប់ សមត្ថកិច្ចកំពុងធ្វើកំណត់ហេតុ ស្តាប់ចម្លើយ ដើម្បីកសាងសំណុំរឿងបញ្ជូនខ្លួនក្រុមជនទាំងអស់នេះទៅសាលាដំបូងអនុវត្តតាមនីតិវិធី៕
