ភ្នំពេញ ៖ កាកបាទក្រហមកម្ពុជា បានប្រគល់ថវិកាចំនួន ២០លានរៀល (លើកទី៩ ) និងស្បៀង-សម្ភារ (លើកទី១១) ជូនអង្គការសង្គ្រោះជនអស់សង្ឃឹម ដើម្បីជួយសម្រាលការលំបាកដល់កុមារកំព្រា អ្នកផ្ទុកមេរោគអេដស៍ និងចាស់ជរាឥតទីពឹង ដែលជាបន្ទុករបស់អង្គការ។ ពិធីប្រគល់នេះ ធ្វើឡើងនៅ នៅទីស្នាក់ការកណ្តាល នាថ្ងៃសុក្រ ថ្ងៃទី ៣ ខែកញ្ញា ឆ្នាំ២០២១នេះ។

ក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំការសាកសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះលោកស្រី ម៉ារី អិន្ស និងសូមឲ្យលោកស្រីមានសុខភាពល្អ មានកម្លាំងមាំមួន ដើម្បីបន្តដឹកនាំ និងជាម្លប់ដ៏កក់ក្តៅដល់កូនៗចៅៗ កុមារកំព្រា អ្នកផ្ទុកមេរោគអេដស៍ និងចាស់ជរាឥតទីពឹង។ ជាមួយគ្នានេះ លោកជំទាវ បានផ្តាំផ្ញេីដល់បុគ្គលិក សមាជិក ដែលរស់នៅក្នុងអង្គការទាំងអស់ ត្រូវប្រកាន់ខ្ជាប់នូវវិធានការនានារបស់ក្រសួងសុខាភិបាល ដើម្បីរួមចំណែកកាត់ផ្តាច់ខ្សែចម្លងវីរុសកូវីដ-១៩ និងការចម្លងវីរុសកូវីដ-១៩ពីបុគ្គលម្នាក់ទៅម្នាក់ ហើយជាពិសេសចូលរួមបញ្ជៀសនូវការរាតត្បាតជាលក្ខណៈទ្រង់ទ្រាយធំនៅក្នុងប្រទេសកម្ពុជា ដោយសារតែ វីរុសបំប្លែងថ្មីដែលតា (Delta) នេះ។

លោកស្រី ម៉ារី អិន្ស ទីប្រឹក្សា អង្គការសង្គ្រោះជនអស់សង្ឃឹម សូមថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាលតែងតែគិតគូរដល់សុខភាពរបស់លោកស្រីផ្ទាល់ ក៏ដូចជាសុខទុក្ខ បុគ្គលិក សមាជិកក្នុងអង្គការគ្រប់ពេលវេលា ហើយថវិកា និងសម្ភារទាំងនេះ យើងមានលទ្ធភាពផ្គត់ផ្គង់អាហារ និងការស្លៀកពាក់គ្រប់គ្រាន់ ដល់ក្មេងៗក្នុងអង្គការ និងសូមជូនពរ សម្តេច នូវពុទ្ធពរទាំង៤ប្រការគឺ អាយុ វណ្ណ សុខៈ ពលៈ កុំបីឃ្លៀងឃ្លាតឡើយ។

អំណោយផ្តល់ជូនរួមមាន ៖ អង្ករ ២តោន មី ៣០កេស ត្រីខ ៥កេស ទឹកក្រូច ១០កេស ទឹកបរិសុទ្ធ ២០កេស ទឹកស៊ីអ៊ីវ ១០យួរ ទឹកត្រី ១០យួរ ប្រេងឆា ៣កេស អំបិល ៥០គីឡូក្រាម ម៉ាស់ ២កេស អាល់កុល ៣០លីត្រ និងថវិកា ២០លានរៀល៕