ក្មេងប្រុសអាយុ៨ឆ្នាំម្នាក់ ត្រូវបានក្រពើខាំអូសយកទៅក្រោមទឹក នៅចំពោះមុខឪពុកម្តាយរបស់គេ។ក្មេងប្រុសរូបនោះមានឈ្មោះ Julio Otero Fernández គេបានទៅលេងទឹកទន្លេ Matina ក្នុងទីក្រុង Limón ប្រទេសកូស្តារីកា ដែលនៅជិតផ្ទះរបស់គាត់ ហើយជិះទូកលេងក្នុងទឹករាក់ត្រឹមជង្គង់។ សត្វក្រពើបាននាំគាត់ចូលទៅក្នុងទឹកជ្រៅ ហើយបានខាំ និងវាយប្រហារគាត់រហូតដល់ស្លាប់។
សាកសពរបស់គាត់នៅតែមិនត្រូវបានរកឃើញនៅឡើយក្នុងរយៈពេលប៉ុន្មានថ្ងៃកន្លងមកនេះ ដោយសារតែភ្លៀងធ្លាក់ខ្លាំង។ Don Julio និង Margini Fernández Flores ដែលជាឪពុក ម្តាយ របស់ក្មេងរងគ្រោះ មានការខូចចិត្តយ៉ាងខ្លាំង ហើយបានអង្វរអាជ្ញាធរឱ្យជួយស្វែងរកសពកូនរបស់គាត់ និងសម្លាប់សត្វក្រពើនោះចោល។ឪពុករបស់ក្មេងអាយុ៨ឆ្នាំនោះបាននិយាយថា៖ «អ្វីដែលពិបាកបំផុតសម្រាប់ប្រពន្ធខ្ញុំគឺឃើញក្រពើអណ្តែតជាប់នឹងខ្លួនកូនប្រុសខ្ញុំ»។
ម្តាយរបស់គាត់បាននិយាយថា “វាមិនអាចទៅរួចទេក្នុងការបន្តរស់នៅក្នុង Matinaនេះ ពីព្រោះនៅគ្រប់ជ្រុងនៃផ្ទះយើង រកឃើញអ្វីមួយដែលរំឭកឱ្យយើងនឹកឃើញ Julito ធ្វើឱ្យយើងឈឺចាប់កាន់តែខ្លាំង។’វាពិបាកណាស់សម្រាប់ពួកយើង ដូច្នេះយើងនឹងត្រូវតែចេញពីទីនេះ៕
គួរបញ្ជាក់ផងដែរថា នៅក្នុងខែមិថុនា ឆ្នាំនេះ ស្ត្រីម្នាក់ត្រូវបានសត្វក្រពើខាំសម្លាប់ និងអូសទៅក្នុងទឹក ខណៈដែលនាងត្រូវបានគេរាយការណ៍ថា កំពុងបោកខោអាវនៅមាត់ច្រាំងនៅឯបឹង Tampico ដូចគ្នា។ អ្នកមើលឃើញមានការភ្ញាក់ផ្អើលពេលឃើញសត្វក្រពើហែលជាមួយសាកសពស្ត្រីរូបនោះ។ កាលពីខែតុលា ឆ្នាំ 2020 ក្រពើមួយក្បាលបានដេញបុរសម្នាក់ ដែលហែលនៅក្នុងទឹកបឹង មុនពេលទាញគាត់ទៅក្រោមទឹក ហើយសម្លាប់គាត់។ បុរសដែលគេមិនបញ្ចេញឈ្មោះដែលគេជឿថា មានអាយុ ៥០ ឬ ៦០ ឆ្នាំត្រូវបានគេរាយការណ៍ថា មិនអើពើនឹងសញ្ញាព្រមាន មិនឱ្យមនុស្សចុះហែលទឹកក្នុងតំបន់នោះទេ៕
ប្រភព៖Daily Mail
ប្រែសម្រួលដោយ៖ វាសនា
