ប្រធានាធិបតីអ៊ុយក្រែន លោក Volodymyr Zelenskyy បានចោទប្រកាន់ទាហានរុស្ស៊ីពីបទប្រព្រឹត្តឧក្រិដ្ឋកម្មសង្គ្រាម និងសម្លាប់ជនស៊ីវិលនៅ Kherson ដែលត្រូវបានអ៊ុយក្រែនដណ្តើមមកវិញ កាលពីសប្តាហ៍មុននេះ។
អ្នកស៊ើបអង្កេតបានចងក្រងឯកសារឧក្រិដ្ឋកម្មសង្គ្រាមរុស្ស៊ីជាង ៤០០ រួចហើយ។ លោក Zelenskyy បាននិយាយនៅក្នុងវីដេអូពេលយប់របស់គាត់កាលពីថ្ងៃអាទិត្យម្សិលម៉ិញ ដោយមិនបានបញ្ជាក់ពីទីកន្លែងដែលសាកសពត្រូវបានគេរកឃើញនោះទេ។លោកបាននិយាយថា៖ «កងទ័ពរុស្ស៊ីបានបន្សល់ទុកនូវការឃោរឃៅដូចគ្នា ដែលវាបានធ្វើនៅក្នុងតំបន់ផ្សេងទៀតនៃប្រទេសរបស់លោក នៅពេលពួកគេចូលឈ្លានពាន»។
ផ្នូរដ៏ធំត្រូវបានគេរកឃើញនៅកន្លែងជាច្រើន នៅទូទាំងប្រទេសអ៊ុយក្រែន ចាប់តាំងពីការចាប់ផ្តើមនៃការលុកលុយរបស់រុស្ស៊ី រួមទាំងសាកសពជនស៊ីវិល ដែលបង្ហាញពីភស្តុតាងនៃការធ្វើទារុណកម្ម ដែលបានរកឃើញនៅក្នុងតំបន់ Kharkiv ភាគឦសាន និងនៅ Bucha ក្បែររដ្ឋធានី Kyiv។ អ៊ុយក្រែនបានចោទទាហានរុស្ស៊ីថា បានប្រព្រឹត្តឧក្រិដ្ឋកម្ម។
គណៈកម្មាការអង្គការសហប្រជាជាតិក្នុងខែតុលាបាននិយាយថា ឧក្រិដ្ឋកម្មសង្គ្រាមត្រូវបានប្រព្រឹត្តនៅក្នុងប្រទេសអ៊ុយក្រែន ហើយថា កងកម្លាំងរុស្ស៊ីទទួលខុសត្រូវ នៃការរំលោភសិទ្ធិមនុស្សនៅក្នុងសប្តាហ៍ដំបូងនៃសង្គ្រាម។
ប្រជាជនអ៊ុយក្រែនក្នុងទីក្រុង Kherson បានសម្តែងនូវអារម្មណ៍ធូរស្រាលយ៉ាងខ្លាំង បន្ទាប់ពីការដកថយរបស់ទ័ពរុស្ស៊ីកាលពីថ្ងៃសុក្រសប្តាហ៍មុននេះ បន្ទាប់ពីការកាន់កាប់អស់រយៈពេលជាច្រើនខែមកនោះ។
តំបន់នេះគឺជាតំបន់មួយក្នុងចំណោមបួន ដែលប្រធានាធិបតីរុស្ស៊ីលោក វ្ល៉ាឌីមៀ ពូទីន បានអះអាងថា បានបញ្ចូលក្នុងខែកញ្ញា ជាទង្វើមួយ ដែលត្រូវបានគេចាត់ទុកថា ជាការខុសច្បាប់ និងបានបរិហារដោយបណ្តាប្រទេសលោកខាងលិច៕
ប្រភព៖ Al Jazeera
ប្រែសម្រួលដោយ៖ វាសនា
