យន្តហោះ LATAM Airlines ហោះចេញពីអាកាសយានដ្ឋានអន្តរជាតិ Lima បានបុកជាមួយរថយន្តពន្លត់អគ្គីភ័យនៅលើផ្លូវរត់ ហើយបានឆាបឆេះ ហេតុការនេះបានកើតឡើងកាលពីថ្ងៃសុក្រចុងសប្តាហ៍កន្លងទៅនេះ។ អាជ្ញាធរបាននិយាយថា អ្នកដំណើរ និងនាវិករបស់យន្តហោះទាំងអស់មានសុវត្ថិភាព ប៉ុន្តែអ្នកពន្លត់អគ្គីភ័យពីរនាក់នៅក្នុងឡាននោះបានស្លាប់។
Lima Airport Partners ជាក្រុមហ៊ុនដែលប្រតិបត្តិការអាកាសយានដ្ឋានអន្តរជាតិ Jorge Chavez បាននិយាយថា ប្រតិបត្តិការនៅឯកន្លែងនេះត្រូវបានផ្អាក។ នៅលើយន្តហោះ Airbus A320neoនោះ មានអ្នកដំណើរចំនួន 102 នាក់ និងសមាជិកនាវិកចំនួន 6 នាក់ ។
លោក Luis Ponce La Jara អគ្គមេបញ្ជាការនៃនាយកដ្ឋានពន្លត់អគ្គីភ័យ បាននិយាយថា អ្នកពន្លត់អគ្គីភ័យពីរនាក់បានស្លាប់ និងម្នាក់បានរងរបួស នៅពេលដែលរថយន្តដឹកទំនិញដែលពួកគេជិះត្រូវបានបុកដោយយន្តហោះ។ ទាំងយន្តហោះ និងរថយន្តពន្លត់អគ្គីភ័យបានធ្វើចលនានៅពេលដែលពួកគេបានបុកគ្នា។
ប្រធានាធិបតី Pedro Castillo បានសម្តែងការរំលែកទុក្ខដល់ក្រុមគ្រួសារនៃអ្នកពន្លត់អគ្គិភ័យដែលបានស្លាប់នោះ។
ជើងហោះហើរ LA2213 កំពុងហោះចេញពីអាកាសយានដ្ឋានសំខាន់របស់លីម៉ា ឆ្ពោះទៅកាន់ទីក្រុង Juliaca ប្រទេសប៉េរូ។
ក្រុមហ៊ុនអាកាសចរណ៍ LATAM បាននិយាយថា ខ្លួនសោកស្ដាយចំពោះការស្លាប់របស់អ្នកពន្លត់អគ្គីភ័យ ហើយនឹងផ្តល់នូវភាពបត់បែនក្នុងការរៀបចំជើងហោះហើរឡើងវិញដល់អ្នកដំណើរដែលរងផលប៉ះពាល់ដោយមិនគិតថ្លៃបន្ថែម។ ប៉ុន្តែគេបាននិយាយថា គេមិនដឹងថាហេតុអ្វីបានជារថយន្តពន្លត់អគ្គិភ័យនៅលើផ្លូវរត់។
Manuel van Oordt អ្នកគ្រប់គ្រងទូទៅនៃ LATAM Airlines ប្រទេសប៉េរូបាននិយាយថា “មិនមានការរាយការណ៍ពីភាពអាសន្នណាមួយនៅលើជើងហោះហើរនោះទេ វាគឺជាជើងហោះហើរដែលស្ថិតក្នុងលក្ខខណ្ឌល្អបំផុតក្នុងការហោះហើរ វាមានសិទ្ធិអនុញ្ញាតឱ្យហោះចេញ ហើយវាបានជួបប្រទះនឹងរថយន្តពន្លត់អគ្គីភ័យនៅលើផ្លូវរត់ ហើយយើងមិនដឹងថារថយន្តនោះកំពុងធ្វើអ្វីនៅទីនោះទេ”។យើងត្រូវតែស៊ើបអង្កេត និងរកមូលហេតុដែលវានៅទីនោះ»។
បើតាមសមត្ថកិច្ច បានឲ្យដឹងថា ហេតុការណ៍នេះ បានកើតឡើងនៅវេលាម៉ោង៣ និង២៥នាទីរសៀល។ ហើយអង្គភាពសង្គ្រោះចំនួនបួនត្រូវបានចល័ត។
អាជ្ញាធរអាកាសចរណ៍បាននិយាយថា ប្រតិបត្តិការនៅអាកាសយានដ្ឋានអន្តរជាតិ Jorge Chavez ត្រូវបានផ្អាករហូតដល់ម៉ោង 1 រសៀលថ្ងៃសៅរ៍( ម៉ោងក្នុងស្រុក)៕
ប្រភព៖CBS
ប្រែសម្រួលដោយ៖ វាសនា