ក្រុមអ្នកជួយសង្គ្រោះក្នុងប្រទេសឥណ្ឌូនេស៊ីកំពុងនាំគ្នាសម្រុកចូលទៅជួយមនុស្សដែលនៅជាប់ក្នុងគំនរបាក់បែកមួយថ្ងៃបន្ទាប់ពីការរញ្ជួយដីបានបំផ្លិចបំផ្លាញទីក្រុង West Java ដោយបានសម្លាប់មនុស្សរាប់សិបនាក់ និងរាប់រយនាក់ផ្សេងទៀតរងរបួស ខណៈដែលអគារបានដួលរលំ។
លោក Dedi Prasetyo អ្នកនាំពាក្យប៉ូលីសបានប្រាប់ទីភ្នាក់ងារសារព័ត៌មាន Antara នៅថ្ងៃអង្គារនេះថា ប៉ូលីសរាប់រយនាក់កំពុងចូលរួមកិច្ចខិតខំប្រឹងប្រែងជួយសង្គ្រោះនៅទីក្រុង Cianjur ដែលនៅជិតបំផុតទៅនឹងចំណុចកណ្តាលនៃការរញ្ជួយដីកម្រិត 5.6 រិចទ័រ។ ទីក្រុងដែលមានប្រជាជន 175,000 ស្ថិតនៅក្នុងតំបន់ភ្នំនៃកោះជ្វាខាងលិច ជាខេត្តដែលមានប្រជាជនរស់នៅច្រើនបំផុតរបស់ប្រទេសឥណ្ឌូនេស៊ី។
លោក Prasetyo បាននិយាយថា បទបញ្ជាភារកិច្ចចម្បងសម្រាប់បុគ្គលិកថ្ងៃនេះ គឺផ្តោតលើការជម្លៀសជនរងគ្រោះ» អភិបាលខេត្ត West Java លោក Ridwan Kamil បាននិយាយថា មនុស្សយ៉ាងហោចណាស់ចំនួន 162 នាក់បានស្លាប់នៅក្នុងការរញ្ជួយដីកាលពីថ្ងៃច័ន្ទ ដែលភាគច្រើនជាកុមារ និងជាង 300 នាក់បានរងរបួស។
អភិបាលក្រុងបានព្រមានអ្នកស្រុកមួយចំនួន ដែលនៅតែជាប់ នៅកន្លែងដាច់ស្រយាល ហើយចំនួនអ្នកស្លាប់អាចកើនឡើង។ លោកបាននិយាយថា អាជ្ញាធរកំពុងប្រតិបត្តិការ “ក្រោមការសន្មត់ថា ចំនួនអ្នករបួស និងស្លាប់នឹងកើនឡើងតាមពេលវេលា”។ អ្នកស្លាប់ខ្លះជាសិស្សនៅសាលាបណ្ដុះបណ្ដាលឥស្លាម ខណៈពេលដែលអ្នកផ្សេងទៀតបានស្លាប់នៅក្នុងផ្ទះរបស់ពួកគេ នៅពេលដែលដំបូល និងជញ្ជាំងធ្លាក់មកលើពួកគេ។
អង្គការ Save the Children Indonesia បាននិយាយថា ខ្លួនកំពុងដាក់ពង្រាយក្រុមមួយទៅកាន់ Cianjur នៅថ្ងៃអង្គារនេះ ដើម្បីវាយតម្លៃផលប៉ះពាល់នៃគ្រោះមហន្តរាយ និងកំណត់តម្រូវការរបស់កុមារ និងមនុស្សពេញវ័យ ដែលរងផលប៉ះពាល់។ វាក៏កំពុងរៀបចំតង់សាលារៀន ឧបករណ៍ទៅសាលា សម្ភារៈកម្សាន្តអប់រំ និងសម្ភារអនាម័យសម្រាប់គ្រួសារសម្រាប់ចែកចាយ។
ការរញ្ជួយដីដ៏ខ្លាំងក្លានៅចម្ងាយប្រហែល 75 គីឡូម៉ែត្រ (45 ម៉ាយល៍)ពីរដ្ឋធានីហ្សាកាតា ដោយបានបំផ្លាញផ្ទះយ៉ាងហោចណាស់ចំនួន 2,200 ខ្នង។ យោងតាមអភិបាលក្រុងបានឱ្យដឹងថា មនុស្សប្រហែល 13,000 នាក់ត្រូវបានបញ្ជូនទៅរកទីជម្រក។
កាលពីខែកញ្ញា ឆ្នាំ 2018 ការរញ្ជួយដីកម្រិត 7.5 រិចទ័របានវាយប្រហារនៅតំបន់ទឹករាក់ពីទីក្រុង Palu ក្នុងទីក្រុង Sulawesi ដែលបង្កឲ្យមានរលកយក្សស៊ូណាមិ ទឹកហូរ និងការបាក់ដីដែលបានបំផ្លិចបំផ្លាញទីក្រុង និងបានសម្លាប់មនុស្សជាង 4,000 នាក់។
នៅខែធ្នូ ឆ្នាំ ២០០៤ ការរញ្ជួយដីកម្រិត ៩.១ រ៉ិចទ័រ នៅកោះស៊ូម៉ាត្រា ភាគខាងលិចប្រទេសឥណ្ឌូនេស៊ី បានបង្កឲ្យមានរលកយក្សស៊ូណាមិ បោកបក់មកលើច្រាំងប្រទេសចំនួន ១៤ ជុំវិញមហាសមុទ្រឥណ្ឌា ដោយបានសម្លាប់មនុស្ស ២២៦.០០០ នាក់ ដែលច្រើនជាងពាក់កណ្តាលនៃពួកគេនៅក្នុងប្រទេសឥណ្ឌូនេស៊ី៕
ប្រភព៖ Al Jazeera
ប្រែសម្រួលដោយ៖ វាសនា
