ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីល្ងាចថ្ងៃព្រហស្បតិ៍ថា អ៊ុយក្រែនបានឈរយ៉ាងរឹងមាំប្រឆាំងនឹងប្រទេសរុស្ស៊ីចាប់តាំងពីការចាប់ផ្តើមនៃសង្រ្គាម ហើយនៅតែមានភាពអត់ធ្មត់។
លោក Zelenskyy បាននិយាយនៅក្នុងវីដេអូមួយនៅលើបណ្តាញ Telegram របស់គាត់ថា “យើងបានស៊ូទ្រាំនឹងសង្រ្គាមពេញលក្ខណៈរយៈពេលប្រាំបួនខែមកហើយ ហើយរុស្ស៊ីមិនបានរកឃើញវិធីដើម្បីបំបែកពួកយើងទេ។ទោះបីជាវាមានការលំបាកយ៉ាងណាក៏ដោយ យើងកំពុងកាន់ព្រំដែនសំខាន់ៗគ្រប់ទិសទី ហើយមានទិសដៅដែលយើងត្រៀមខ្លួនដើម្បីឈានទៅមុខ។
លោកបាននិយាយទៀតថា កងទ័ពរុស្ស៊ីបានចាប់ផ្តើមវាយប្រហារផ្នែកហេដ្ឋារចនាសម្ព័ន្ធស៊ីវិល និងថាមពល ដោយសារតែការបរាជ័យរបស់ខ្លួននៅលើសមរភូមិ។ការវាយប្រហារបែបនេះ បានចាប់ផ្តើមភ្លាមៗបន្ទាប់ពីកងទ័ពរុស្ស៊ីត្រូវបានបង្ខំឱ្យភៀសខ្លួនចេញពីតំបន់ Kherson ។ នេះគឺជាការសងសឹករបស់អ្នកដែលបានបាត់បង់” ។
លោក Zelenskyy ថា បញ្ហាទាក់ទងនឹងទឹកស្អាត និងអគ្គីសនីនៅតែមាននៅទូទាំងប្រទេសអ៊ុយក្រែន ដោយសារតែការវាយប្រហារដោយមីស៊ីលរបស់រុស្ស៊ី ទៅលើហេដ្ឋារចនាសម្ព័ន្ធថាមពលដ៏សំខាន់។ ហើយបញ្ហាទឹកស្អាតដែលមានសុវត្ថិភាពមាននៅក្នុងតំបន់ចំនួន 15 ជាមួយនឹងតំបន់ Kyiv, Kirovohrad, Dnipropetrovsk, Lviv, Poltava និង Kharkiv ក្នុងស្ថានភាពធ្ងន់ធ្ងរ។ ហើយយើងកំពុងស្តារជាបណ្តើរៗនូវអគ្គិសនី កំដៅ ការផ្គត់ផ្គង់ទឹក និងទំនាក់ទំនង។
កាលពីថ្ងៃព្រហស្បតិ៍ រុស្ស៊ីបានបដិសេធការកំណត់គោលដៅហេដ្ឋារចនាសម្ព័ន្ធស៊ីវិលនៅអ៊ុយក្រែន។ អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅក្នុងសន្និសីទកាសែតថា រុស្ស៊ីមិនធ្វើការវាយប្រហារលើហេដ្ឋារចនាសម្ព័ន្ធស៊ីវិលរបស់អ៊ុយក្រែនទេ៕
ប្រភព៖ A News
ប្រែសម្រួលដោយ៖ វាសនា
