ភ្នំពេញ ៖ ជនសង្ស័យម្នាក់បានជិះកង់មកប្លន់យកម៉ូតូពីនារីម្នាក់បានសម្រេច ហើយជិះរត់គេចខ្លួន តែត្រូវជនរងគ្រោះស្រែកចោរៗផ្អើលដល់ប្រជាពលរដ្ឋជួយដេញចាប់បាន វាយម្នាក់មួយដៃមួយជើងឡើងទ្រមខ្លួន ទើបប្រគល់ឲ្យសមត្ថកិច្ច។
ហេតុការណ៍នេះបង្កឲ្យមានការភ្ញាក់ផ្អើលឡើង កាលពីម៉ោង១០ និង២០នាទីយប់ថ្ងៃចន្ទ ទី១៩ ខែធ្នូ ឆ្នាំ២០២២ ស្ថិតនៅតាមបណ្ដោយផ្លូវបេតុង (ផ្សារដីថ្មី) ក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។
បើតាមសម្ដីជនរងគ្រោះបានឲ្យដឹងថា មុនពេលកើតហេតុរូបគាត់កំពុងអង្គុយលើម៉ូតូប៊ីត ពណ៌សលាយក្រហម ពាក់ស្លាកលេខភ្នំពេញ1JL-3822 ស្រាប់តែលេចមុខជនសង្ស័យម្នាក់ជិះកង់មកឈប់ក្បែរម៉ូតូរបស់ខ្លួន រួចធ្វើសកម្មភាពច្រានរូបគាត់ធ្លាក់ពីលើម៉ូតូ ហើយជនសង្ស័យបានឡើងជិះម៉ូតូរត់គេចខ្លួនតាមបណ្ដាយផ្លូវស្រេង ភ្លាមៗនោះ រូបនាងក៏ស្រែកចោរៗភ្ញាក់ផ្អើលដល់ប្រជាពលរដ្ឋ ជួយដេញពីក្រោយរហូតមកដល់ផ្លូវ២១៧ចំណុចមុខការ៉ាសសំាងកាល់តិច ទើបចាប់ជនសង្ស័យបាន វាយម្នាក់មួយដៃជើងឡើងទ្រមខ្លួនទើបប្រគល់ឲ្យសមត្ថកិច្ច ។
បន្ទាប់ពីកើតហេតុ សមត្ថកិច្ចមូលដ្ឋាបានចុះទៅដល់ បាននាំជនសង្ស័យ និងជនរងគ្រោះទៅកាន់ប៉ុស្ដិ៍នគរបាលរដ្ឋបាលស្ទឹងមានជ័យទី៣ សួរនាំ និងដាក់ពាក្យបណ្ដឹង ដើម្បីកសាងសំណុំរឿងបញ្ជូនខ្លួនទៅសាលាដំបូងរាជធានីភ្នំពេញចាត់ការបន្តតាមនីតិវិធី ៕
ដោយ ៖វិសាល
