មានករណីគ្រោះថ្នាក់ចរាចរណ៍មួយ ដែលបង្កឡើងដោយរថយន្តដឹកកម្មកររោងចក្រ ម៉ាកហាន់ដាយ HYUNDAI ពណ៌ស គ្មានស្លាកលេខ ដឹកកម្មករ កម្មការិនីចំនួន ៦៥ នាក់ (ស្រី ៦០នាក់)បានក្រឡប់នៅលើផ្លូវជាតិលេខ ៥១ នៅចន្លោះគីឡូម៉ែត្រលេខ ២៦-២៧ ត្រង់ចំណុចភូមិស្តុកស្លាត ឃុំភ្នំតូច ស្រុកឧដុង្គ ខេត្តកំពង់ស្ពឺ។
ហេតុការណ៍គ្រោះថ្នាក់ចរាចរណ៍នេះបានកើតឡើង នាវេលាម៉ោង ០៦ និង ២០ នាទីព្រឹកថៃ្ងទី១០ ខែមករា ឆ្នាំ២០២៣ បណ្តាលឱ្យកម្មករ កម្មការិនីរបួសធ្ងន់ ស្រាលចំនួន ៦នាក់។
បើតាមសមត្ថកិច្ចនគរបាលស្រុកឧដុង្គ ខេត្តកំពង់ស្ពឺបានឱ្យដឹងថា អ្នកបើកបររថយន្តដឹកកម្មករ កម្មការិនី ដែលក្រឡាប់នេះមានឈ្មោះ ស្រួច សិទ្ធ ភេទប្រុស អាយុ ២៨ ឆ្នាំ រស់នៅភូមិត្រពាំងកន្សែង ឃុំក្សេមក្សាន្ដ ស្រុកឧដុង្គ បន្ទាប់ពីកើតហេតុ បានគេចខ្លួនបាត់។
សមត្ថកិច្ចបានបញ្ជាក់ថា មូលហេតុ ដែលនាំឱ្យរថយន្តក្រឡាប់ បណ្តាលមកពីអ្នកបើកបរបានបើករថយន្តលឿន វ៉ាជែង គេចរថយន្តមួយគ្រឿងទៀត ដែលបើកបរក្នុងទិសដៅបញ្ច្រាសទិសគ្នាមិនប្រុងប្រយ័ត្ន ក៏រេចង្កូតធ្លាក់ផ្លូវបណ្តាលឱ្យរថយន្តក្រឡប់តែម្តង។ហើយអ្នករងគ្រោះត្រូវបានសមត្ថកិច្ចជួយអន្តរាគម ដឹកជញ្ជូនយកទៅសង្គ្រោះនៅមន្ទីរពេទ្យបង្អែកភ្លាមៗនោះដែរ៕
ដោយ៖វាសនា