ភ្នំពេញ ៖ បុរសម្នាក់ជាជនជាតិចិន បានបើករថយន្តយ៉ាងលឿនជ្រុលទៅបុករថយន្តសាំយ៉ុង ពីមុខពេញទំហឹង បណ្ដាលឱ្យរងការខូចខាតយ៉ាងដំណំ ។ ហេតុការណ៍នេះបានកើតឡើងកាលពីម៉ោង១០ និង២០នាទីយប់ ថ្ងៃទី១០ ខែមករា ឆ្នាំ២០២៣ នៅតាមបណ្ដោយផ្លូវអក្សរបិត (ផ្លូវក្រោយផ្សារទំនើប អេនអន១) ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ប្រភពព័ត៌មានពីសន្ដិសុខដែលប្រចាំការនៅក្បែរកន្លែងកើតហេតុបានឱ្យដឹងថា មុនពេលកើតហេតុ គេឃើញរថយន្តសាំយ៉ុងមួយគ្រឿង ពណ៌ស ពាក់ស្លាកលេខភ្នំពេញ 2R-6906 បានធ្វើដំណើរទិសដៅពីត្បូងទៅជើងក្នុងល្បឿនល្មម ខណ:មកដល់ចំណុចកើតហេតុស្រាប់តែមានបុរសម្នាក់ជាជនជាតិចិនបានបើករថយន្តម៉ាក់ SAIC MAXUS ពណ៌ស ពាក់ស្លាកលេខ ភ្នំពេញ 2BC-1586 ទិសដៅបញ្ច្រាស់គ្នាក្នុងល្បឿនលឿន និងរ៉េចង្កូតចូលខុសកន្លងផ្លូវទៅបុករថយន្តសាំយ៉ុងចំបញ្ឆិតពីមុខពេញទំហឹង បណ្ដាលឱ្យរថយន្តទាំងពីរគ្រឿងរងការខូចខាតពីមុខខាងស្ដាំយ៉ាងដំណំដូចគ្នា តែមិនបង្កគ្រោះថ្នាក់ដល់មនុស្សនោះឡើយ ។
បន្ទាប់ពីកើតហេតុ សមត្ថកិច្ចមូលដ្ឋានបានចុះមកដល់ បានសហការជាមួយជំនាញចរាចរណ៍ខណ្ឌចំការមន ដើម្បីឲ្យភាគីទាំងសងខាងសម្របសម្រួលគ្នាមួយជំហ៊ានសិន ដោយបុរសជនជាតិចិន ព្រមសងថ្លៃខូចខាតទៅលើរថយន្តសាំយ៉ុងចំនួន១៦០០ដុល្លារ ដើម្បីបញ្ចប់រឿងនៅនឹងកន្លែងតែម្ដង ៕
ដោយ ៖ វិសាល
