ភ្នំពេញ ៖ បុរសម្នាក់បានជិះម៉ូតូក្នុងល្បឿនយ៉ាងលឿន ខណៈមេឃកំពុងតែភ្លៀងមិនប្រយ័ត្ន ក៏ជ្រុលទៅបុករង្វង់មូលដែលទើបតែសាងសង់មិនមានសញ្ញាចំណាំងផ្លាត ពេញទំហឹង បណ្ដាលឱ្យដួលបោកក្បាលស្លាប់ភ្លាមៗនៅនឹងកន្លែង។
ហេតុការណ៍នេះបានកើតឡើង កាលពីម៉ោង១០យប់ថ្ងៃទី១០ ខែមករា ឆ្នាំ២០២៣ នៅចំណុចរង្វង់មូលជិតគល់ស្ពានអាកាសជម្ពូវ័ន តាមបណ្តោយផ្លូវវិមានឈ្នះឈ្នះហៅផ្លូវទំនប់កប់ស្រូវ ក្នុងសង្កាត់ចោមចៅទី៣ ខណ្ឌពោធិ៏សែនជ័យ រាជធានីភ្នំពេញ។
ជនរងគ្រោះនៅមិនទាន់ស្គាល់អត្តសញ្ញានោះទេ ដោយស្លៀកពាក់អាវយឺតពណ៌ខ្មៅស្លៀកខោកាប៊ូយ ពណ៌ខ្មៅ ពាក់ស្បែកជើងប៉ាត់តាពណ៌ដី សម្បុរកម្ពស់ប្រហែលមួយម៉ែត្រ៧០ ជិះម៉ូតូម៉ាកឌ្រីម សេ125 ស៊េរីឆ្នាំ២០២២ ពណ៌ខ្មៅ ពាក់ស្លាកលេខ ភ្នំពេញ1JO.4144 ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញបុរសជនរងគ្រោះជិះម៉ូតូតាមបណ្ដោយផ្លូវវិមានឈ្នះឈ្នះ ក្នុងទិសដៅពីជើងមកត្បូង យ៉ាងលឿនក៏បានជ្រុល ទៅបុកខឿនថ្មរង្វង់មូលដែលគេសាងសង់មិនទាន់រួចមិនទាន់មាន ភ្លើងបំភ្លើងផ្លូវមិនទាន់មានចំណាំងផ្លាត គួបផ្សំមេឃកំពង់តែភ្លៀង និងងងឹតផងនោះបណ្ដាលឱ្យ បែកមួកសុវត្តិភាពបែកក្បាលបាក់ករស្លាប់ភ្លាមៗនៅហ្នឹងកន្លែងកើតហេតុ។ ចំណែកឯម៉ូតូគឺបាក់កង់ខាងមុខខ្ទេច។
បន្ទាប់ពីកើតហេតុ សមត្ថកិច្ចជំនាញចរាចរណ៍ខណ្ឌចុះមកយកម៉ូតូទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យជាបណ្ដោះអាសន្ន ។ ចំណែកឯសពជនរងគ្រោះ ត្រូវបានសមត្ថកិច្ចធ្វើកំណត់ហេតុរួចប្រគល់ឱ្យរថយន្តដឹកសពយកទៅតម្កល់ទុកនៅវត្តទឹកថ្លាដើម្បីស្រាវជ្រាវរកសាច់ញាតិមកទទួលយកធ្វើបុណ្យតាមប្រពៃណីនាពេលក្រោយ ៕
ដោយ ៖ វិសាល
