នៅក្នុងប្រទេសកម្ពុជា នាពេលបច្ចុប្បន្ននេះ ខេត្តណាក៏មានដំណាំស្វាយ ឬចម្ការស្វាយដែរ ប៉ុន្តែដោយសារតម្លៃផ្លែស្វាយបានធ្លាក់ថ្លៃយ៉ាងគំហុកក្នុងរយៈពេលប៉ុន្មានឆ្នាំចុងក្រោយនេះ បានធ្វើឱ្យម្ចាស់ចម្ការស្វាយមួយចំនួនបានបោះបង់របរនេះចោល ហើយអ្នកខ្លះទៀតបានកាប់ដើមស្វាយចោលទៅដាំដំណាំអ្វីផ្សេងវិញ ដែលពួកគាត់គិតថា មានទីផ្សារល្អ។ទោះជាយ៉ាងណា នៅក្នុងរយៈពេល ១១ខែ នៃឆ្នាំ២០២២កន្លងទៅនេះ ប្រទេសកម្ពុជាបានធ្វើការនាំចេញផ្លែស្វាយស្រស់ និងដំណាប់ស្វាយទៅកាន់ទីផ្សារអន្តរជាតិបានប្រមាណជិត ១៧ម៉ឺនតោន។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។
នៅក្នុងរបាយការណ៍របស់ក្រសួងកសិកម្មដដែលបានបង្ហាញឱ្យដឹងថា ក្នុងរយៈពេល ១១ ខែ ឆ្នាំ ២០២២ គឺគិតចាប់ពីខែមករា ដល់ខែវិច្ឆិកា ឆ្នាំ ២០២២ កម្ពុជាបាននាំចេញផលិតផលពីផ្លែស្វាយទៅកាន់ទីផ្សារអន្តរជាតិសរុបចំនួន ១៦៩ ៦៥៨ តោន មានការធ្លាក់ចុះប្រមាណជា ៣០,២៨ ភាគរយ បើធៀបនឹងរយៈពេលដូចគ្នាកាលពីឆ្នាំ ២០២១ ដែលមានចំនួន ២៤៣ ៣៥៥ តោន។ សម្រាប់រយៈពេល ១១ ខែ ឆ្នាំ ២០២២ ការនាំចេញផ្លែស្វាយស្រស់បានចំនួន ១៥២ ៩៩៥ តោន ធ្លាក់ចុះ ៣២,៤៧ភាគរយពីចំនួន ២២៦ ៥៧៧,៧១ តោន នារយៈពេលដូចគ្នាឆ្នាំ ២០២១ និងការនាំចេញតំណាប់ស្វាយ សម្រេចបាន ១៦ ៦៦៣,៥ តោនធ្លាក់ចុះ ០,៦៨ ភាគរយពីចំនួន ១៦ ៧៧៧,៨២ តោន។
ទីផ្សារសម្រាប់ការនាំចេញផ្លែស្វាយស្រស់ពីកម្ពុជារួមមាន៖ ប្រទេសវៀតណាម ថៃ ចិន កូរ៉េ ហុងកុង និងអូទ្រីស។ ចំណែកប្រទេសដែលទិញទិញតំណាប់ស្វាយពីកម្ពុជានោះ មានដូចជា៖ ប្រទេសចិន, ថៃ ,ហ្វីលីពីន, វៀតណាម ,ជប៉ុន ,រុស្ស៊ី, អ៊ីតាលី ,អង់គ្លេស, កូរ៉េ, អាមេរិក និងអូស្ត្រាលី។
ទោះជាយ៉ាងណា អ្នកជំនាញសេដ្ឋកិច្ចបានមើលឃើញថា ប្រទេសចិនជាទីផ្សារដ៏ធំសម្រាប់ការនាំចេញផលិតផលកសិកផលរបស់កម្ពុជា ហើយនៅពេលរដ្ឋាភិបាលចិនបានប្រកាសដកចេញនូវវិធានការរឹតត្បឹតទាក់ទងនឹងជំងឺកូវីដ-១៩ កាលពីថ្ងៃទី ៨ ខែមករា ឆ្នាំ ២០២៣ទៀតនោះ រំពឹងថា នៅក្នុងឆ្នាំ២០២៣នេះ ការនាំចេញផ្លែស្វាយស្រស់ និងផលិតផលកសិកម្មដទៃទៀតទៅកាន់ទីផ្សារប្រទេសចិននឹងមានសន្ទុះកើនឡើង៕
ដោយ៖ សំណាង