ភ្នំពេញ៖ក្លឹបបាល់ទាត់ព្រះខ័នរាជស្វាយរៀង បានសម្រេចផ្ដល់កិច្ចសន្យាបន្តជាមួយកីឡាករបរទេស ២ រូប ជាផ្លូវការ បន្ទាប់ពីចំណាយពេល ១ រដូវកាល (២០២២) កន្លងទៅ។កីឡាករទាំងពីររូបនេះរួមមាន កីឡាករខ្សែប្រយុទ្ធកាណាដា Marcus Haber និងកីឡាករខ្សែការពារជប៉ុន Takashi Odawara សម្រាប់រយៈពេល ១ រដូវកាលបន្ថែមទៀត ពោលគឺនៅរដូវកាល២០២៣/២០២៤ ដែលគ្រោងនឹងចាប់ផ្ដើមនៅខែសីហា ខាងមុខនេះ។
ការបន្តកិច្ចសន្យាថ្មីជាមួយកីឡាករទាំងពីររូបនេះផងដែរ ត្រូវបានចាត់ទុកថា ជាឆ្អឹងខ្នងដ៏សំខាន់សម្រាប់ក្លិប ដ្បិតរដូវកាលមុនគេបានរួមចំណែកច្រើន បើទោះបីជានៅចុងរដូវកាលហាក់មានបម្រែបម្រួលមិនសូវសមប្រកបក៏ដោយ ជាពិសេសនោះ ដោយសារការរងរបួសរបស់កីឡាករខ្សែការពារជប៉ុន Takashi Odawara ដែលបាននាំឲ្យប៉ះពាល់ដល់ប្រព័ន្ធការពារ។
គិតមកដល់ពេលនេះ ព្រះខ័នរាជស្វាយរៀង បាននាំចូលកីឡាករថ្មីចំនួន ៤ រូបហើយ ក្នុងនោះរួមមាន កីឡាករ សេត រ៉ូស៊ីប ខ្សែការពារស្លាបឆ្វេង ផ្ទេរមកពីក្លឹបបឹងកេត, កីឡាករកូនកាត់ខ្មែរ-បារាំង គួច ដានី ដែលផ្ទេរមកពីក្លឹបណាហ្គាវើលដ៍, ខ្សែប្រយុទ្ធ ណារ៉ុង កក្កដា ផ្ទេរមកពីសមាគមកីឡាបាល់ទាត់កងយោធពលខេមរភូមិន្ទ និងម្នាក់ទៀតអ្នកចាំទី វីរៈ ដារ៉ា ដែលខ្ចីជើងពីក្លិបវិសាខា។
ជាមួយគ្នានេះ ក៏មានកីឡាករចំនួន ៥ រូប ចាកចេញផងដែរ រួមមាន កីឡាករ ឃាង ម៉េងហួរ, រស់ គង់សម្រេច, ត្រាយ វិចិត្រ, ឡុង ភារ៉ាត់ និង Victor Blasco៕
ដោយ៖ វិកគី