ភ្នំពេញ៖ បុរសម្នាក់ផឹកស្រាស្រវឹងដើរទៅចាប់សត្វឆ្កែរបស់ខ្លួនបំណងកាប់ធ្វើម្ហូបបែរជាត្រូវសត្វឆ្កែនោះខាំវិញបណ្តាលឱ្យប្រកាច់បែកពពុះមាត់ត្រូវបានក្រុមកងសង្គ្រោះ៧១១ដឹកយកទៅមន្ទីរពេទ្យភ្លាមៗ។
ហេតុការណ៍នេះបានកើតឡើងកាលពីម៉ោង១០យប់ ថ្ងៃទី១៧ ខែមករា ឆ្នាំ២០២៣ នៅភូមិពុទ្ទ្រា សង្កាត់គោករកា ខណ្ឌព្រែកព្នៅ រាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះឈ្មោះសាក់ ផាន់ណារ៉ា អាយុ២២ឆ្នាំ ស្នាក់ភូមិកើត ហេតុខាងលើ។
ប្រភពព័ត៌មានពីប្រជាពលរដ្ឋបានឱ្យដឹងថា បុរសម្នាក់នេះត្រូវសត្វឆ្កែខាំចំនួន៣ដងមកហើយ តែមិនដែលបានទៅមន្ទីរពេទ្យចាក់ថ្នាំការពារវ៉ាក់សាំម្តងណានោះឡើយ រហូតមកដល់ថ្ងៃកើតហេតុបន្ទាប់ពីផឹកស្រាស្រវឹងនឹកខឹងសត្វឆ្កែរបស់ខ្លួនដែលធ្លាប់ខាំក៏ដើរទៅចាប់បំណងវាយសម្លាប់កាប់ធ្វើម្ហូបដើម្បីក្លែមស្រាបន្តទៀត តែបែរជាសត្វឆ្កែនោះខាំវិញបណ្តាលឱ្យរបួសហើយក៏ប្រកាច់បែកបពុះមាត់តែម្តង។
បន្ទាប់ពីកើតហេតុប្រជាពលរដ្ឋបាននាំគ្នាដេញវាយសម្លាប់សត្វឆ្កែនោះចៀសវាងដើរខាំអ្នកភូមិតទៀត ហើយបានរាយការណ៍ទៅអាជ្ញាធរមានសមត្ថកិច្ចនឹងស្នើរសុំរថយន្តក្រុមកងសង្គ្រោះ៧១១ នៃកងពលតូចលេខ៧០ មកដឹកយកទៅសង្គ្រោះនៅមន្ទីរពេទ្យកាល់ម៉ែត៕
ដោយ៖វិសាល
