ភ្នំពេញ ៖ បុរសម្នាក់ជាបុគ្គលិកប្រមូលសំរាមក្រុមហ៊ុនស៊ីនទ្រី សង្ស័យងងុយដេកបានធ្លាក់ពីលើរថយន្តចូលក្រោមកង់កិនស្លាប់ភ្លាមៗនៅនឹងកន្លែង។ហេតុការណ៍នេះបង្កឲ្យមានការភ្ញាក់ផ្អើលឡើងកាលពីម៉ោង៦និង៣០នាទីព្រឹកថ្ងៃទី១៨ ខែមករា ឆ្នាំ២០២៣ នៅតាមផ្លូវលេខ២១៧ ក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ។
សមត្ថកិច្ចបានឲ្យដឹងថា សពជនរងគ្រោះមានឈ្មោះ ហឿន សុខហួយ អាយុ២៦ឆ្នាំ មុខរបរ បុគ្គិលិកប្រមូលសំរាមក្រុមហ៊ុនស៉ីនទ្រី(វេនយប់) ទីលំនៅ ភូមិព្រៃទទឹក ឃុំព្រៃទទឹក ស្រុកស៉ីធរកណ្តាល ខេត្តព្រៃវែង (ស្លាប់នៅកន្លែងកើតហេតុ) ។ ចំណែករថយន្តបង្កម៉ាកHINO ពណ៌ទឹកលឿង គ្មានស្លាកលេខ(របស់ក្រុមហ៊ុនស៊ីនទ្រី) ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុ ជនរងគ្រោះ និងក្រុមការងារ៣នាក់ទៀតបានអង្គុយនៅខាងក្រោយនៃរថយន្តស៊ីនទ្រី ខណៈកំពុងធ្វើដំណើរតាមបណ្ដោយផ្លូវ២១៧ ស្រាប់តែជនរងគ្រោះធ្លាក់ពីលើរថយន្តចូលកង់ក្រោយកិនស្លាប់ភ្លាមៗនៅនឹងកន្លែងកើតហេតុតែម្ដង ។ ចំណែកតៃកុង ឃើញសភាពបែបនេះ ក៏ភ័យចុះពីលើរថយន្តគេចខ្លួនបាត់ស្រមោល ។
បន្ទាប់ពីកើតហេតុ សមត្ថកិច្ចមូលដ្ឋានបានចុះមកដល់ និងសហការជាមួយជំនាញចរាចរណ៍យករថយន្តបង្កទៅរក្សាទុកនៅអធិការដ្ឋាននគរបាលខណ្ឌដង្កោ។ ចំណែកសពជនរងគ្រោះ ត្រូវបានសមត្ថកិច្ចធ្វើកំណត់ហេតុប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕
ដោយ ៖ វិសាល