យោងតាមមន្ត្រីកំពូលម្នាក់ បានឱ្យដឹងថា ជនស៊ីវិលអ៊ុយក្រែនជាង 9,000 នាក់ រួមទាំងកុមារចំនួន 453 នាក់ ត្រូវបានសម្លាប់ចាប់តាំងពីការឈ្លានពានរបស់រុស្ស៊ីកាលពី 11 ខែមុន។ជំនួយការប្រធានាធិបតីអ៊ុយក្រែន លោក Andriy Yermak បានប្រកាសពីចំនួនអ្នកស្លាប់ដ៏អាក្រក់នៅឯវេទិកាសេដ្ឋកិច្ចពិភពលោក (WEF) នៅទីក្រុង Davos ប្រទេសស្វីសកាលពីថ្ងៃអង្គារ ដោយបន្ថែមថា “យើងបានចុះបញ្ជីឧក្រិដ្ឋកម្មចំនួន 80,000 ដែលប្រព្រឹត្តដោយពួកឈ្លានពានរុស្ស៊ី។
លោក Yermak បានអំពាវនាវជាថ្មីឲ្យសាលាក្តីអន្តរជាតិពិសេសមួយដើម្បីកាត់ទោសរុស្ស៊ី និងសំណងចំពោះការបំផ្លិចបំផ្លាញដែលបណ្តាលមកពីការឈ្លានពាន។ កាលពីថ្ងៃច័ន្ទ អង្គការសហប្រជាជាតិបាននិយាយថា ជនស៊ីវិលជាង៧ពាន់នាក់ត្រូវបានសម្លាប់។ វាមិនអាចទៅរួចទេក្នុងការផ្ទៀងផ្ទាត់តួរលេខទាំងពីរ ប៉ុន្តែការប៉ាន់ប្រមាណនៃអ្នកស្លាប់ដោយសារសង្រ្គាមត្រូវបានគេយល់ថា ទាបជាងការពិត។
នៅក្នុងកិច្ចប្រជុំកំពូលនៃមេដឹកនាំពិភពលោក និងធុរកិច្ចនៅទីក្រុង Davos សង្រ្គាមនៅអ៊ុយក្រែនគឺជាប្រធានបទសំខាន់មួយ។ ជំទាវទីមួយរបស់ប្រទេសអ៊ុយក្រែន លោកស្រី Olena Zelenska បានប្រាប់អ្នកចូលរួមថា ឪពុកម្តាយកំពុងស្រក់ទឹកភ្នែកពេលមើលគ្រូពេទ្យព្យាយាមជួយសង្គ្រោះកូនរបស់ពួកគេ។លោកស្រីបាននិយាយថា “យើងមិនអាចអនុញ្ញាតឱ្យ Chernobyl ថ្មីកើតឡើងទេ” ។យើងទាំងអស់គ្នាជឿជាក់ថា គ្មានបញ្ហាសកលបែបនេះ ដែលមនុស្សជាតិមិនអាចដោះស្រាយបានទេ។ ពេលនេះកាន់តែសំខាន់នៅពេលដែលការឈ្លានពានរបស់រុស្ស៊ីនៅអឺរ៉ុបបង្កបញ្ហាប្រឈមផ្សេងៗ។
ប្រជាជនប្រហែល 345 លាននាក់ក្នុង 82 ប្រទេសកំពុងប្រឈមមុខនឹងអសន្តិសុខស្បៀងធ្ងន់ធ្ងរ យោងតាមកម្មវិធីស្បៀងអាហារពិភពលោករបស់អង្គការសហប្រជាជាតិ កើនឡើងពី 135 លាននាក់ក្នុង 53 ប្រទេស មុនពេលការរាតត្បាតនៃមេរោគឆ្លង និងសង្គ្រាមនៅអ៊ុយក្រែន។
Zelenska បាននិយាយថា វាជាការប្រមាថដល់មនុស្សជាតិ និងធម្មជាតិរបស់មនុស្សដែលមានការអត់ឃ្លានយ៉ាងច្រើន។កាំជ្រួចមួយបានវាយប្រហារប្លុកផ្ទះល្វែងមួយក្នុងទីក្រុង Dnipro កាលពីថ្ងៃសៅរ៍ ដោយបានសម្លាប់មនុស្សយ៉ាងតិច ៤៤ នាក់។
ប្រធានគណៈកម្មការអឺរ៉ុប Ursula von der Leyen ក៏បានជំរុញឱ្យមេដឹកនាំពិភពលោកនៅ Davos បន្តផ្តល់ជំនួយដល់អ៊ុយក្រែន។ លោកស្រីបាននិយាយបន្ទាប់ពីសុន្ទរកថារបស់ Zelenska ថា “អ៊ុយក្រែនចង់ក្លាយជាសមាជិកនៃសហភាពអឺរ៉ុប ហើយវាគឺជាឱកាសដ៏ល្អឥតខ្ចោះមួយដើម្បីទទួលយកការវិនិយោគ និងកំណែទម្រង់ដើម្បីត្រួសត្រាយផ្លូវនេះសម្រាប់អ៊ុយក្រែនឆ្ពោះទៅកាន់សហភាពអឺរ៉ុប” ៕
ប្រភព៖ Al Jazeera
ប្រែសម្រួលដោយ៖ វាសនា
