ភ្នំពេញ៖ សមាជិកក្រុមជម្រើសជាតិកម្ពុជា លើប្រភេទកីឡាតេក្វាន់ដូ WT កីឡាករ សំ យូដេត បានបង្ហាញពីការត្រៀមចិត្តរួចរាល់ដើម្បីប្រជែងមេដាយមាស ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ លើទឹកដីកំណើតរបស់ខ្លន បន្ទាប់ពីទទួលរងការខកចិត្តកាលពីឆ្នាំ២០២១ នៅប្រទេសវៀតណាម។

កាលពីស៊ីហ្គេម លើកទី៣១ ឆ្នាំ២០២១ យូដេត បានប្រកួតក្នុងវិញ្ញាសាប្រយុទ្ធ ទម្ងន់ ៥៨គីឡូក្រាម គេបានឆ្លងកាត់ការប្រកួតយ៉ាងស្វិតស្វាញ ដំបូងគេបានយកឈ្នះកីឡាករទីម័រខាងកើត ២២-៩ បន្ទាប់មកយកឈ្នះកីឡាករឡាវ Phouvilay Yommalath ក្នុងវគ្គពាក់កណ្ដាលផ្ដាច់ព្រ័ត្រ លទ្ធផល ៥០-២៣ និងបានឡើងទៅវគ្គផ្ដាច់ព្រ័ត្រ ប៉ុន្តែបានចាញ់កីឡាករថៃ Thanakrit Yodrak ក្នុងលទ្ធផល ៣៤-៥។

សំ យូដេត បាននិយាយយ៉ាងដូច្នេះថា៖ «ខ្ញុំមិនមានការសោកស្តាយខ្លាំងពេកនោះទេ ព្រោះខ្ញុំបានប្រឹងប្រែងអស់លទ្ធភាព ផ្ទុយទៅវិញពេលត្រឡប់មកខ្មែរ ខ្ញុំបានស្វែងយល់ពីកំហុស និងបានគិតថាខ្ញុំនៅខ្វះខាតបច្ចេកទេសដែលត្រូវតែកែតម្រូវ»។

ចាប់តាំងពីស៊ីហ្គេម លើកទី៣១ ឆ្នាំ២០២១ (លើកមកធ្វើ ឆ្នាំ២០២២) នៅវៀតណាម បានបញ្ចប់ មកទល់ពេលនេះ គឺមានរយៈពេលជាង ៩ខែមកហើយ ចាប់ពីពេលនោះមក យូដេត ក៏មិនបង្អង់ដៃពីការហ្វឹកហាត់ ហើយបានខិតខំប្រឹងប្រែងជាប្រចាំ និងមានអារម្មណ៍ថាខ្លួនរីកចម្រើនជាងមុន។

សំ យូដេត ក៏បានលើកឡើងពីការលំបាកខ្លះៗនៅអំឡុងពេលហ្វឹកហាត់ ដ្បិតពុំសូវមានការប្រកួតអន្តរជាតិ។ យ៉ាងណាមិញ បើមិនមានអ្វីប្រែប្រួល សំ យូដេត​ បានត្រៀមខ្លួនរួចរាល់ហើយដើម្បីប្រកួត Pre SEA Games នៅខែក្រោយ និងចាត់ទុកជាការប្រកួតមួយដ៏ល្អ ដើម្បីអាចឱ្យស្ទង់មើលពីសមត្ថភាពខ្លួនឯងកាន់តែប្រសើរ មុននឹងស៊ីហ្គេមមកដល់។

សំ យូដេត កើតថ្ងៃទី៣១ ខែមិនា ឆ្នាំ១៩៩៧ នៅខេត្តសៀមរាប។ គេធ្លាប់បានហ្វឹកហាត់កីឡានេះ ពេលនៅវ័យប្រហែល ១២ ទៅ ១៣ឆ្នាំ ប៉ុន្តែក៏បានឈប់មួយរយៈធំ ទើបដល់ពេលពេញវ័យក៏ត្រឡប់មកហាត់ម្តងទៀតជាមួយគ្រូដដែលប្រហែលឆ្នាំ២០១៧។ ហ្វឹកហាត់តែ ១ឆ្នាំ នៅឆ្នាំ២០១៨ យូដេត ក៏បានជាប់ជម្រើសជាតិកម្ពុជា ជាលើកដំបូង។

ក្រោយពីជាប់ជម្រើសជាតិ កីឡាករវ័យ ២៥ឆ្នាំរូបនេះ ធ្លាប់ចូលរួមប្រកួត ASEAN Taekwondo Championship 2019 និងទទួលបានមេដាយសំរឹទ្ធ ហើយនៅឆ្នាំជាមួយគ្នានោះ គេបានចូលរួមការប្រកួតកីឡានគរបាល និងកងកម្លាំងពន្លត់អគ្គិភ័យពិភពលោក (World Police and Fire Games) ដោយទទួលបានមេដាយសំរឹទ្ធដូចគ្នា ខណៈការបង្ហាញខ្លួនលើកដំបូងក្នុងស៊ីហ្គេម នៅឆ្នាំ២០១៩ នៅប្រទេសហ្វីលីពីន គេពុំអាចដណ្ដើមមេដាយបានឡើយ។

ចន្លោះឆ្នាំ២០២០-២០២១ ក្នុងវិបត្តិកូវីដ-១៩ យូដេត ក៏ខកខានចេញទៅប្រកួតនៅព្រឹត្តិការណ៍សំខាន់ៗជាច្រើន លុះចូលដល់ឆ្នាំ២០២២ ដែលស្ថិតក្នុងស៊ីហ្គេមលើកទី៣១ ឆ្នាំ២០២១ (លើកមកប្រកួតនៅឆ្នាំ២០២២) នៅប្រទេសវៀតណាម យូដេត ទទួលបានមេដាយប្រាក់ និងចុងក្រោយឈ្នះមេដាយមាស ក្នុងការប្រកួតកីឡានគរបាល និងកងកម្លាំងពន្លត់អគ្គិភ័យពិភពលោក (World Police and Fire Games)៕

ដោយ៖ វិកគី