មន្ត្រីពន្លត់អគ្គីភ័យម្នាក់ និងអង្គការសហប្រជាជាតិបាននិយាយថា ភ្លើងដ៏ធំមួយបានឆាបឆេះនៅជុំរុំជនភៀសខ្លួនដ៏ចង្អៀតមួយសម្រាប់ប្រជាជនរ៉ូហ៊ីងយ៉ានៅភាគខាងត្បូងប្រទេសបង់ក្លាដែស ដែលបណ្តាលឱ្យមនុស្សរាប់ពាន់នាក់គ្មានផ្ទះសម្បែង។ មន្ត្រីមកពីនាយកដ្ឋានពន្លត់អគ្គីភ័យ Balukhali បានប្រាប់ Al Jazeera ថា មនុស្សរាប់ពាន់នាក់បានបាត់បង់ផ្ទះសម្បែង ខណៈដែលភ្លើងដែលបានឆាបឆេះកាលពីថ្ងៃអាទិត្យម្សិលម៉ិញបានឆេះ ឬខូចខាតខ្តមយ៉ាងតិចក៏ 2,000 ខ្ទមដែរ។
អគ្គីភ័យបានវាយប្រហារជុំរុំទី 11 ក្នុងស្រុក Cox’s Bazar ដែលជាស្រុកព្រំដែន ដែលមានជនភៀសខ្លួនរ៉ូហ៊ីងយ៉ាជាង១លាននាក់រស់នៅ ដោយភាគច្រើនបានភៀសខ្លួនចេញពីការបង្ក្រាបដែលដឹកនាំដោយយោធានៅក្នុងប្រទេសមីយ៉ាន់ម៉ាក្នុងឆ្នាំ 2017 ។ រាយការណ៍ពីទីក្រុង Dhaka លោក Tanvir Chowdhury របស់ Al Jazeera បាននិយាយថា ជំរុំ Balukhali គឺជាជំរុំមួយក្នុងចំណោមជំរុំទាំង 32 នៅ Cox’s Bazar ។ លោក Chowdhury បាននិយាយថា “ខ្ទមនីមួយៗមានមនុស្សពី 4 ទៅ 5 នាក់រស់នៅជាមួយគ្នាជាគ្រួសារ ហើយយ៉ាងហោចណាស់ពាក់កណ្តាលនៃចំនួនប្រជាជនគឺជាស្ត្រី និងកុមារ” ដោយបន្ថែមថា មន្ត្រីពន្លត់អគ្គីភ័យ និងជួយសង្គ្រោះមិនទាន់បានរាយការណ៍ពីជនរងគ្រោះណាម្នាក់ទេរហូតមកដល់ពេលនេះ ប៉ុន្តែពួកគេនៅតែស្វែងរកមនុស្ស។ លោកបានពន្យល់ថា តំបន់ដែលភ្លើងបានឆាបឆេះមានលក្ខណៈជាភ្នំ ដែលធ្វើឲ្យក្រុមសង្គ្រោះពិបាកទៅដល់ និងសម្រាប់ក្រុមគ្រួសារក្នុងការរត់គេចខ្លួន។
ទីភ្នាក់ងារជនភៀសខ្លួន Regina De La Portilla របស់អង្គការសហប្រជាជាតិបានប្រាប់ Al Jazeeraថា ជម្រកភាគច្រើននៅក្នុងជុំរុំគឺធ្វើឡើងដោយឫស្សី និងតង់។ អ្នកស្រីបានបន្តថា៖ «សម្ភារដែលយើងប្រើក្នុងជុំរុំសុទ្ធតែជាបណ្ដោះអាសន្នដែលអាចឆាបឆេះបាន ហើយវាបានរាលដាលយ៉ាងឆាប់រហ័សដោយសារការកកស្ទះនៃជុំរុំនោះ។
អ្នកពន្លត់អគ្គីភ័យ ដែលត្រូវបានជួយដោយអ្នកស្ម័គ្រចិត្តក្នុងតំបន់ អាចគ្រប់គ្រងភ្លើងបាន ប៉ុន្តែ Portilla បាននិយាយថា មួយភាគបីនៃចំនួនប្រជាជននៃជុំរុំបានបាត់បង់ផ្ទះសម្បែង និងទ្រព្យសម្បត្តិរបស់ពួកគេ ហើយថា UN កំពុងផ្តល់សេវាថែទាំសុខភាពផ្លូវចិត្ត។ នាងបាននិយាយថា “យើងបានពង្រាយបុគ្គលិកសុខភាពសហគមន៍ចំនួន 90 នាក់ (មានជនភៀសខ្លួនផងដែរ) ដែលត្រូវបានបណ្តុះបណ្តាលដើម្បីផ្តល់ជំនួយដំបូង និងជំនួយផ្លូវចិត្ត ហើយប្រសិនបើនរណាម្នាក់ត្រូវការជំនួយបន្ថែម ពួកគេត្រូវបានបញ្ជូនទៅសេវាសុខភាពដើម្បីដោះស្រាយជាមួយនឹងរបួសផ្លូវចិត្តប្រភេទនេះ។
ជនភៀសខ្លួនរ៉ូហ៊ីងយ៉ាជាង១លាននាក់បានភៀសខ្លួនពីប្រទេសមីយ៉ាន់ម៉ាទៅកាន់ប្រទេសបង់ក្លាដែស ក្នុងរយៈពេលជាច្រើនទសវត្សរ៍មកហើយ រួមទាំងប្រហែល 740,000 នាក់ដែលបានឆ្លងកាត់ព្រំដែនដែលចាប់ផ្តើមនៅក្នុងខែសីហា ឆ្នាំ 2017 នៅពេលដែលយោធាមីយ៉ាន់ម៉ាបានបើកការបង្ក្រាបយ៉ាងឃោរឃៅ។ ស្ថានភាពនៅក្នុងប្រទេសមីយ៉ាន់ ម៉ាកាន់តែអាក្រក់ទៅៗចាប់តាំងពីមានការកាន់កាប់ដោយយោធានៅឆ្នាំ 2021នោះមក៕
ប្រែសម្រួលដោយ៖ វាសនា
