ភ្នំពេញ៖ ក្មេងស្រីម្នាក់បានស្លាប់នៅនឹងកន្លែង ខណៈបើកម៉ូតូទាក់ដៃចង្កូតជាមួយរ៉ឺម៉កធ្វើដំណើរស្របគ្នាបណ្តាលឲ្យដួលទៅនឹងថ្នល់ត្រូវរថយន្តកុនតឺន័រកិនស្លាប់ ហើយជិះគេចខ្លួនបាត់ស្រមោល។
ហេតុការណ៍នេះបង្កឲ្យមានការភ្ញាក់ផ្អើលឡើងកាលពីម៉ោង៩ និង៣០នាទីយប់ ថ្ងៃទី១៦ ខែមីនា ឆ្នាំ២០២៣ នៅផ្លូវបេតុង ក្នុងភូមិព្រៃព្រីងជើង២ សង្កាត់ចោមចៅទី៣ ខណ្ឌពោធិ៍សែនជ័យ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេបានឃើញក្មេងស្រីម្នាក់ជិះម៉ូតូម៉ាកហុងដា ធូដេ ពណ៌ខៀវ ពាក់ស្លាក លេខភ្នំពេញ1CR 3328 ធ្វើដំណើរតាមបណ្តោយផ្លូវបេតុងក្នុងទិសដៅពីត្បូងទៅជើង ស្របជាមួយរ៉ឺម៉ក ខណៈមកដល់កន្លែងកើតហេតុស្រាប់តែទាក់ដៃចង្កូតគ្នាជាមួយរ៉ឺម៉ក បណ្តាលឲ្យដួលបោកទៅនឹងថ្នល់ ភ្លាមៗនោះក៏មានរថយន្តកុងតឺន័របើកមកបញ្ច្រាសទិសគ្នាកិនពីលើបណ្តាលឲ្យជនរងគ្រោះស្លាប់ភ្លាមៗនៅនឹងកន្លែង។ក្រោយកើតហេតុរ៉ឺម៉កនឹងរយន្តកុងតឺន័របានបើកគេចខ្លួនបាត់ស្រមោល។
បន្ទាប់ពីកើតហេតុសមត្ថកិច្ចមូលដ្ឋានបានចុះទៅដល់ ហើយក៏បានទំនាក់ទំនងទៅក្រុមគ្រួសារមកទទួលសពយកទៅធ្វើបុណ្យតាមប្រពៃណី។ ចំណែករថយន្ត និងម៉ូតូ សមត្ថកិច្ចនឹងធ្វើការស្រាវជ្រាវតាមចាប់យកមកដោះស្រាយតាមច្បាប់៕
ដោយ៖វិសាល