ភ្នំពេញ ៖ ស្ត្រីម្នាក់រងរបួស បន្ទាប់ពីជិះម៉ូតូត្រូវរថយន្តពីរគ្រឿងបុកគ្នាហើយក៏រេចង្កូតមកប៉ះម៉ូតូខ្ទាតទៅបោកផ្ទប់ទ្វារផ្ទះប្រជាពលរដ្ឋ។ហេតុការណ៍នេះបានកើតឡើង កាលពីម៉ោង១ និង៣០នាទីរំលងអធ្រាត្រឈានចូលថ្ងៃទី២១ ខែមីនា ឆ្នាំ២០២៣ នៅផ្លូវសម្ដេចជាស៊ីមកែងនឹងផ្លូវ២០១១ ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាករRANGE ROVER ពណ៌ទឹកប្រាក់ ពាក់ស្លាកលេខភ្នំពេញ2T-8988 បើកបរដោយបុរសម្នាក់និងរួមដំណើរជាមួយនារីម្នាក់ទៀតតាមបណ្ដោយផ្លូវសម្តេចជាស៊ីម ក្នុងទិសដៅពីកើតទៅលិចក្នុងល្បឿនយ៉ាងលឿន ខណៈមកដល់ចំណុចកើតហេតុបានជ្រុលទៅបុករថយន្តម៉ាកTOYOTA HIGH LANDER ពណ៌បៃតង ពាក់ស្លាក លេខភ្នំពេញ2AF-8035 បើកបរដោយបុរសម្នាក់ តាមបណ្តោយផ្លូវ២០១១ ទិសដៅពីត្បូងមកជើងយ៉ាងពេញទំហឹង ហើយក៏រេចង្កូតទៅប៉ះម៉ូតូម៉ាកHONDA MOOVE ពណ៌ខ្មៅលាយផ្កាឈូក ពាក់ស្លាកលេខភ្នំពេញ1HY-4357 ដែលបើកបរដោយនារីម្នាក់ តាមបណ្ដោយផ្លូវ២០១១បណ្តាលឲ្យរងរបួស និងខ្ទាតម៉ូតូចូលក្រោមរថយន្តRANGE ROVERដែលចតស្ងៀមនៅចិញ្ចើមផ្លូវ។ រីឯរថយន្ត HIGH LANDERមិនទាន់អស់ល្បឿនក៏វិលទៅបោកផ្ទប់ទ្វារផ្ទះប្រជាពលរដ្ឋ។ ភ្លាមៗនោះ គេឃើញរថយន្ត HIGH LANDER បើកចេញពីកន្លែងកើតហេតុទៅផ្លូវភ្នំពេញហាណូយមកដល់ស្ពានអូតាគុជត្រូវបានសមត្ថកិច្ចឃាត់បានយកមកកន្លែងកើតហេតុវិញ។ ចំណែកឯនារីដែលរងរបួសត្រូវបានរថយន្ត សាម៉ុយដឹកយកទៅសង្គ្រោះផងដែរ ។
បន្ទាប់ពីកើតហេតុ សមត្ថកិច្ចជំនាញចរាចរណ៍ខណ្ឌសែនសុខ បានចុះមកវាស់វែងយកមធ្យោបាយទាំងបីគ្រឿងទៅរក្សាទុករង់ចាំដោះស្រាយគ្នានៅពេលក្រោយ៕
ដោយ ៖ វិសាល