ប៉ូលីសបាននិយាយថា និស្សិតសាកលវិទ្យាល័យមួយនៅក្នុងប្រទេសកេនយ៉ាត្រូវបានសម្លាប់ ហើយមនុស្សជាង 200 នាក់ត្រូវបានចាប់ខ្លួននៅក្នុងការតវ៉ាទូទាំងប្រទេសប្រឆាំងនឹងរដ្ឋាភិបាលរបស់លោកប្រធានាធិបតី William Ruto ជុំវិញតម្លៃនៃការរស់នៅឡើងខ្ពស់ កាលពីថ្ងៃច័ន្ទ។ ក្រុមបាតុករបានដើរតាមដងផ្លូវនៃរដ្ឋធានីណៃរ៉ូប៊ី និងទីក្រុងមួយចំនួនទៀត ដើម្បីឆ្លើយតបទៅនឹងការអំពាវនាវឱ្យធ្វើបាតុកម្មដោយមេដឹកនាំគណបក្សប្រឆាំង Raila Odinga ។
អ្នកខ្លះបានដុតភ្លើងនៅតាមផ្លូវ ហើយគប់ដុំថ្មដាក់ប៉ូលិស។ ប៉ូលីសបានបាញ់ឧស្ម័នបង្ហូរទឹកភ្នែក និងបាញ់ទឹក រួមទាំងក្បួនរថយន្តរបស់ Odinga នៅពេលដែលគាត់និយាយទៅកាន់អ្នកគាំទ្រពីដំបូលរថយន្តរបស់គាត់។ ប៉ូលីសបាននិយាយថា មន្ត្រី២៤នាក់បានរងរបួសក្នុងការប៉ះទង្គិចគ្នានេះ។ ពួកគេមិនបានបង្ហាញតួលេខនៃការរងរបួសក្នុងចំណោមបាតុករនោះទេ។
មនុស្សដែលត្រូវបានសម្លាប់ ជានិស្សិតនៅសកលវិទ្យាល័យ Maseno ភាគខាងលិចប្រទេសកេនយ៉ា ត្រូវបានប៉ូលីសបាញ់ចំកញ្ចឹងក ។ នេះបើយោងតាមរបាយការណ៍របស់ប៉ូលីស។
វាជាការផ្ទុះឡើងនៃអំពើហិង្សានយោបាយដ៏ធំលើកដំបូងនៅក្នុងប្រទេសអាហ្វ្រិកខាងកើតមួយនេះ ចាប់តាំងពីលោក Ruto ចូលកាន់តំណែងកាលពីប្រាំមួយខែមុន។ លោក Ruto បានធ្វើឱ្យ Odinga ចាញ់ការបោះឆ្នោតជាលើកទីប្រាំជាប់ៗគ្នា ទោះបីជា Odinga អះអាងថា ការបោះឆ្នោតត្រូវបានលួចបន្លំ យ៉ាងក៏ដោយ។ លោកបានជំទាស់នឹងលទ្ធផលកាលពីឆ្នាំមុន នៅចំពោះមុខតុលាការកំពូល តែតុលាការកំពូលបានតម្កល់ជ័យជម្នះរបស់ Ruto៕
ប្រភព៖ Al Jazeera
ប្រែសម្រួលដោយ៖ វាសនា
