យ៉ាងហោចណាស់មនុស្ស 12 នាក់បានស្លាប់នៅក្នុងប្រទេសអាហ្វហ្គានីស្ថាន និងប៉ាគីស្ថាន ដោយការរញ្ជួយដីដ៏ខ្លាំងមួយ​ ដែលបានលាតសន្ធឹងរាប់ពាន់គីឡូម៉ែត្រ។ទីភ្នាក់ងារស្ទាបស្ទង់ភូមិសាស្ត្រសហរដ្ឋអាមេរិក បាននិយាយថា ការរញ្ជួយដីកម្រិត 6.5 រ៉ិចទ័រ ស្ថិតនៅក្បែរទីក្រុង Jurm នៅភាគឦសានប្រទេសអាហ្វហ្គានីស្ថាន ប៉ុន្តែជម្រៅ 187 គីឡូម៉ែត្រ (116 ម៉ាយ) បានកាត់បន្ថយការខូចខាតយ៉ាងទូលំទូលាយ។

ការរញ្ជួយដីនេះបានវាយប្រហារនៅម៉ោង 09 និង30 នាទីយប់ (1700 GMT) ម៉ោងនៅទីក្រុងកាប៊ុល នៅថ្ងៃអង្គារនេះ និងមានរយៈពេលជាង 30 វិនាទី ត្រូវបានរញ្ជួយពីអាស៊ីកណ្តាលទៅកាន់ទីក្រុង New Delhi ក្នុងប្រទេសឥណ្ឌា ដែលមានចម្ងាយជាង 2,000 គីឡូម៉ែត្រ។

លោក Bilal Faizi អ្នកនាំពាក្យនៃសេវាសង្គ្រោះបន្ទាន់ 1122 របស់ប៉ាគីស្ថាននៅ Khyber Pakhtunkhwa បានប្រាប់ AFP ថា “វាគឺជាការរញ្ជួយដីដ៏ខ្លាំងមួយ ហើយយើងខ្លាចការខូចខាតជាអតិបរមាដោយសារកម្រិតខ្លាំង។

តំបន់នេះត្រូវបានវាយប្រហារជាញឹកញាប់ដោយការរញ្ជួយដី ជាពិសេសនៅតំបន់ភ្នំ Hindu Kush ដែលស្ថិតនៅជិតប្រសព្វនៃបន្ទះផែនដីអឺរ៉ាស៊ី និងឥណ្ឌា។

មនុស្សជាង 55,000 នាក់ត្រូវបានសម្លាប់ដោយការរញ្ជួយដីដែលបានវាយប្រហារភាគអាគ្នេយ៍ប្រទេសទួរគី និងផ្នែកខ្លះនៃប្រទេសស៊ីរីកាលពីខែមុន ដែលបង្កើនការភ័យខ្លាចពាសពេញតំបន់។ លោក Ikhlaq Kazmi សាស្ត្រាចារ្យចូលនិវត្តន៍នៅទីក្រុង Rawalpindi ប្រទេសប៉ាគីស្ថានបាននិយាយថា “ក្មេងៗបានចាប់ផ្តើមស្រែកថាមានការរញ្ជួយដី។ យើងទាំងអស់គ្នាបានរត់ចេញ។ មន្ត្រីនៅក្នុងខេត្ត Khyber Pakhtunkhwa ភាគខាងជើងនៃរដ្ឋធានីប៉ាគីស្ថាន បាននិយាយថា មនុស្សប្រាំបួននាក់ត្រូវបានសម្លាប់នៅក្នុងការរញ្ជួយដីនេះ ក្នុងនោះមានស្ត្រីពីរនាក់ និងកុមារពីរនាក់។

នៅក្នុងប្រទេសអាហ្វហ្គានីស្ថាន ក្រុមមន្ត្រីបានរាយការណ៍ថា មនុស្ស 3 នាក់បានស្លាប់ និង 44 នាក់បានរងរបួស ប៉ុន្តែការភ្ជាប់ទូរស័ព្ទ និងអ៊ីនធឺណេតទៅកាន់ផ្នែកដាច់ស្រយាលនៃប្រទេសនេះត្រូវបានកាត់ផ្តាច់ ហើយការទំនាក់ទំនងមានភាពយឺតយ៉ាវ។ អ្នកនាំពាក្យរដ្ឋាភិបាលលោក Zabihullah Mujahid បាននិយាយថា មណ្ឌលសុខភាពនៅទូទាំងប្រទេសត្រូវបានដាក់ឱ្យមានការប្រុងប្រយ័ត្នខ្ពស់៕

ប្រភព៖ A News

ប្រែសម្រួលដោយ៖ វាសនា