ភ្នំពេញ ៖ បុរសម្នាក់ទំនងជាស្រវឹងស្រាបានបើករថយន្តធ្លាក់ចូលក្នុងប្រឡាយទឹកបឹងសាឡាងក្រឡាប់ផ្ងារជើងច្រង៉ាងឡើងលើ។ហេតុការណ៍នេះបានកើតឡើង កាលពីវេលាម៉ោង ១២ និង៥០នាទីយប់រំលងអាធ្រាត្រឈានចូលថ្ងៃទី ២៣ខែមិនាឆ្នាំ ២០២៣ ស្ថិតនៅតាមបណ្ដោយផ្លូវលូប្រឡាយលូបឹងសាឡាង ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
ប្រភពព័ត៌មានពីប្រជាពលរដ្ឋ ដែលនៅកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តម៉ាកfortunerមួយគ្រឿង ពណ៌ស ពាក់ស្លាកលេខ រដ្ឋ 17 2.7117 បើកបរដោបុរសម្នាក់ធ្វើដំណើរចេញពីផ្លូវលំមួយខ្សែ ទិសដៅពីត្បូងមកជើងក្នុងល្បឿនយ៉ាងលឿន លុះមកដល់ចំណុចកើតហេតុ ស្រាប់តែរេចង្កូតធ្លាក់ចូលទៅក្នុងប្រឡាយទឹកលូបឹងសាឡាង បណ្តាលឱ្យរថយន្តក្រឡាប់ផ្ងារជើងខូចខាតយ៉ាងដំណំ។ ចំណែកម្ចាស់រថយន្តត្រូវបានប្រជាពលរដ្ឋជិតខាងជួយបានឡើងមកលើគោកវិញ មិនមានរងរបួសអ្វីនោះទេ ហើយក៏បានដើរគេចពីកន្លែងកើតហេតុបាត់ស្រមោលផងដែរ ។
បន្ទាប់ពីកើតហេតុ អាជ្ញាធរមូលដ្ឋានដោយឃើញស្ថានភាពមិនប៉ះពាល់ទៅលើមនុស្ស និងមិនប៉ះពាល់ទ្រព្យសម្បត្តិរដ្ឋក៏ឱ្យម្ចាស់រថយន្តទាក់ទងទៅរថយន្តស្ទូចមកស្ទូចយករថយន្តរបស់ខ្លួនទៅជួសជុលដោយខ្លួនឯង៕
ដោយ ៖ វិសាល
