មន្ត្រីក្នុងតំបន់បាននិយាយកាលពីថ្ងៃអាទិត្យម្សិលម៉ិញនេះថា ប្រទេសរុស្ស៊ីកំពុងប្រែក្លាយទីក្រុង Avdiivka របស់អ៊ុយក្រែនទៅជាសាកសពនៃសំណង់អគារបាក់បែក ដោយបង្កើនការបាញ់ផ្លោង និងបង្ខំឱ្យបិទទីក្រុងជួរមុខមួយនេះស្ទើរតែទាំងស្រុង។ យោងតាមក្រុមមន្ត្រីបាននិយាយថា ជនស៊ីវិលប្រហែល 2,000 នាក់ត្រូវបានទុកចោលនៅក្នុងទីក្រុង Avdiivka ដែលជាទីក្រុងក្នុងតំបន់ Donetsk មានចម្ងាយប្រហែល 90 គីឡូម៉ែត្រ (56 ម៉ាយ) ភាគនិរតីនៃ Bakhmut ដែលត្រូវបានឡោមព័ទ្ធដោយកងទ័ពរុស្សី។

ទីក្រុងនេះមានប្រជាជនរស់នៅមុនសង្គ្រាមជាង 30,000 នាក់។ ប្រធានរដ្ឋបាលយោធារបស់ទីក្រុងលោក Vitaliy Barabash បាននិយាយនៅលើកម្មវិធីផ្ញើសារ Telegram ថា “ខ្ញុំសោកសៅក្នុងការនិយាយនេះ ប៉ុន្តែ Avdiivka កាន់តែដូចជាកន្លែងមួយពីខ្សែភាពយន្តក្រោយ apocalyptic” ។ លោក Barabash បន្ថែមថា ការជម្លៀសបុគ្គលិកដែលនៅសេសសល់នៅក្នុងទីក្រុងបានចាប់ផ្តើម ហើយការទទួលភ្ញៀវតាមទូរស័ព្ទនឹងត្រូវបានបិទក្នុងពេលឆាប់ៗនេះ។ ជាមួយនឹងកងកម្លាំងរុស្សី ទទួលបានការកើនឡើងជាបណ្តើរៗនាពេលថ្មីៗនេះ នៅលើផ្នែកម្ខាងនៃទីក្រុង Avdiivka យោធាអ៊ុយក្រែនបានព្រមានកាលពីសប្តាហ៍មុនថា ទីក្រុងនេះអាចក្លាយជា “Bakhhmut ទីពីរ” ដែលជាកន្លែងនៃការប្រយុទ្ធគ្នាដ៏កាចសាហាវរយៈពេលជាច្រើនខែបានប្រែក្លាយទីក្រុងទៅជាគំនរបាក់បែក។

កាលពីថ្ងៃអាទិត្យ ការបាញ់ផ្លោងរបស់រុស្សីបានសំដៅទៅលើអគារខ្ពស់ចំនួនពីរនៅ Avdiivka ដែលមានចម្ងាយត្រឹមតែ 10 គីឡូម៉ែត្រពីជាយក្រុងភាគខាងជើងនៃទីក្រុង Donetsk ដែលស្ថិតនៅក្រោមការគ្រប់គ្រងរបស់ទីក្រុងម៉ូស្គូតាំងពីឆ្នាំ 2014 ។ យោងតាមយោធាអ៊ុយក្រែន បានឲ្យដឹងថា មនុស្សម្នាក់បានរងរបួស នៅក្នុងការវាយប្រហារតាមអាកាសជាច្រើនលើកទៅលើ Avdiivka កាលពីថ្ងៃសៅរ៍។

ប្រទេសរុស្ស៊ីបានបដិសេធមិនកំណត់គោលដៅលើជនស៊ីវិលនៅក្នុងសង្រ្គាមរយៈពេល 13 ខែ ដែលខ្លួនបានធ្វើប្រឆាំងនឹងប្រទេសជិតខាងរបស់ខ្លួននោះទេ។ដោយសារតែសង្គ្រាមនេះ បានធ្វើឱ្យមនុស្សរាប់ពាន់នាក់ស្លាប់ រាប់លាននាក់បានផ្លាស់ទីលំនៅ និងទីក្រុងអ៊ុយក្រែនរាប់សិបទីក្រុងស្ទើរតែ ឬមួយផ្នែកត្រូវបានលុបចោល៕

ប្រភព៖ A News

ប្រែសម្រួលដោយ៖ វាសនា