នាយករដ្ឋមន្ត្រីប៉ូឡូញនឹងបង្កើនការផលិតគ្រាប់រំសេវរបស់ខ្លួន ដើម្បីគាំទ្រដល់កិច្ចខិតខំប្រឹងប្រែងសង្រ្គាមរបស់អ៊ុយក្រែន ដែលជាផ្នែកមួយនៃកម្មវិធីសហភាពអឺរ៉ុប ដើម្បីផ្តល់ឱ្យទីក្រុង Kyiv នូវគ្រាប់កាំភ្លើងធំ នេះបើយោងតាមនាយករដ្ឋមន្ត្រី Mateusz Morawiecki បានប្រកាសកាលពីថ្ងៃច័ន្ទ។
លោក Morawiecki បាននិយាយ នៅកំឡុងដំណើរទស្សនកិច្ចទៅកាន់រោងចក្រមួយ នៅភាគអាគ្នេយ៍នៃខេត្ត Podkarpackie ថា “តម្រូវការបន្ទាន់បំផុតរបស់កងកម្លាំងអ៊ុយក្រែនគឺគ្រាប់រំសេវ។ គណៈរដ្ឋមន្ត្រីនឹងប្រកាសផែនការរយៈពេលវែងពិសេសមួយ ក្នុងការជំរុញការផលិតគ្រាប់រំសេវនៅក្នុងប្រទេសប៉ូឡូញ ដែលនឹងរួមចំណែកដល់ការបំពេញតម្រូវការផ្ទាល់ខ្លួនរបស់ប្រទេស និងអ៊ុយក្រែន។
លោក Morawiecki បាននិយាយថា វាមិនមែនជារឿងសម្ងាត់ទេ ដែលសមត្ថភាពបច្ចុប្បន្ននៅអឺរ៉ុបមិនគ្រប់គ្រាន់នោះទេ។ដោយលោកបានបញ្ជាក់ថា ទាំងសហគ្រាសឯកជន និងរដ្ឋនឹងចូលរួមក្នុងផែនការនេះ។
កាលពីសប្តាហ៍មុន សហភាពអឺរ៉ុបបានឈានដល់កិច្ចព្រមព្រៀងមួយដើម្បីបញ្ជូនគ្រាប់រំសេវមួយលានគ្រាប់ដល់អ៊ុយក្រែនក្នុងរយៈពេល ១២ ខែខាងមុខនេះ។ បណ្តាប្រទេសសហភាពអឺរ៉ុបនឹងបរិច្ចាគគ្រាប់រំសេវពីឃ្លាំងស្តុករបស់ពួកគេទៅឱ្យអ៊ុយក្រែន ហើយថែមទាំងរួមគ្នាទិញសំបកគ្រាប់ថ្មីសម្រាប់ប្រទេសនេះផងដែរ៕
ប្រភព៖ A News
ប្រែសម្រួលដោយ៖ វាសនា