ការិយាល័យរដ្ឋអាជ្ញាសាធារណៈរបស់ប្រទេសហូឡង់បាននិយាយកាលពីថ្ងៃអង្គារថា មន្ត្រីគយរបស់ប្រទេសហូឡង់បានរឹបអូសគ្រឿងញៀនប្រភេទកូកាអ៊ីន ដែលមានទម្ងន់ជាង 1.6 តោននៅក្នុងកំពង់ផែ Rotterdam ដែលមានតម្លៃរហូតដល់ 120 លានអឺរ៉ូ (130 លានដុល្លារ) ។ ការិយាល័យនេះបាននិយាយក្នុងសេចក្តីថ្លែងការណ៍មួយថា មនុស្ស៥នាក់ត្រូវបានចាប់ខ្លួន ដោយសង្ស័យពីបទរត់ពន្ធគ្រឿងញៀនប្រភេទនេះ។
ក្រុមអ្នកស៊ើបអង្កេតកំពុងតាមចាប់មនុស្សទាំងប្រាំនាក់ បន្ទាប់ពីមនុស្សសង្ស័យម្នាក់ត្រូវបានគេរាយការណ៍ថា កំពុងស្ថិតនៅក្នុងបរិវេណកំពង់ផែ។ ពួកគេបានរកឃើញការដឹកជញ្ជូនគ្រឿងញៀនប្រភេទកូកាអ៊ីន នៅក្នុងកុងតឺន័រ ដែលផ្ទុកដោយចេកពីប្រទេសកូស្តារីកា។ គ្រឿងញៀនត្រូវបានបំផ្លាញចោល បន្ទាប់ពីការរកឃើញកាលពីសប្តាហ៍មុន។ ទីក្រុង Rotterdam គឺជាកំពង់ផែអឺរ៉ុបដ៏សំខាន់មួយ ដែលកូកាអ៊ីនត្រូវបានគេរត់ពន្ធចូលក្នុងតំបន់នេះ៕
ប្រភព៖ A News
ប្រែសម្រួលដោយ៖ វាសនា