មុខសញ្ញាគប់កញ្ចក់រថយន្ដ និងបាញ់កញ្ចក់រថយន្ដនៅលើផ្លូវល្បឿនលឿន ដែលជាបក្ខពួកនៅសេសសល់ម្នាក់រត់គេចនោះ ត្រូវបានសមត្ថកិច្ចស្រាវជ្រាវបង្រ្កាប និងឃាត់ខ្លួនបានហើយ កាលពីយប់ថៃ្ងទី០៩ ខែកក្កដា ឆ្នាំ២០២៣នេះ ស្របពេលមុខសញ្ញាគ្រោងរៀបចំផែនការឡើងផ្លូវបន្ដ។
លោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺបានឱ្យដឹងថា កាលពីវេលាម៉ោង២៣ និង៣០នាទីយប់ថ្ងៃទី៩ ខែកក្កដា ឆ្នាំ២០២៣ ដោយមានវិធានការច្បាស់លាស់ពីកំលាំងផ្ដល់ព័ត៌មាន កម្លាំងជំនាញព្រហ្មទណ្ឌស្រុកសំរោងទង សហការជាមួយប៉ុស្ដិ៍នគរបាលត្រពាំងគងបានឃាត់ខ្លួនមុខសញ្ញាឈ្មោះ ព្រំ គឿន ហៅពន្លក ភេទប្រុស អាយុ២៩ឆ្នាំ រស់នៅភូមិស្លា ឃុំវល្លិ៍ស ស្រុកសំរោងទង ខេត្តកំពង់ស្ពឺ ។
បើតាមលោកវរសេនីយ៍ឯក ឃុត សុផល អធិការស្រុកសំរោងទង បានបញ្ជាក់ឱ្យដឹងថា មុខសញ្ញាឈ្មោះព្រំ គឿន ហៅពន្លក ជាបក្ខពួកបានធ្វើសកម្មភាពរត់គេចខ្លួន បន្ទាប់ពីសមត្ថកិច្ចបានឃាត់ខ្លួនបក្ខពួកបានម្នាក់នឹងបានឆ្លើយសារភាពថា ខ្លួន និងបក្ខពួកពិតជាបានធ្វើសកម្មភាពយកជំពាមកៅស៊ូបាញ់កញ្ចក់រថយន្ត នៅចំណុចខាងលិចស្ពានផ្លូវល្បឿនលឿន និងបានរត់គេចក្រោយពីការឃាត់ខ្លួនឈ្មោះ ឈឿម ដែន និងថាខ្លួនពិតជាអ្នកធ្វើសកម្មភាពរួមគ្នាពិតប្រាកដមែន ។ ជាក់ស្ដែងមុខសញ្ញាឈ្មោះ ឈឿម ដែន ត្រូវបានចៅក្រមសម្រេចឃុំខ្លួនបណ្ដោះអាសន្ននៅពន្ធនាគារខេត្តកំពង់ស្ពឺ រួចហើយ ៕