ក្នុងរយៈពេល ៦ខែ ដើមឆ្នាំ ២០២៣នេះ កម្ពុជារកចំណូលបានពីការនាំចេញជ័រកៅស៊ូ និងផលិតផលធ្វើអំពីកៅស៊ូទៅកាន់ទីផ្សារអន្តរជាតិបានជាង ៣២០ លានដុល្លារសហរដ្ឋអាមេរិក បើធៀបនឹងរយៈពេលដូចគ្នាកាលពីឆ្នាំ ២០២២គឺមានការកើនឡើងប្រមាណជាង ៤២.១ ភាគរយៈ។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា។
ដោយឡែកសម្រាប់ការនាំចេញកៅស៊ូនៅក្នុងខែមិថុនា ឆ្នាំ ២០២៣នេះ កម្ពុជាទទួលបានចំណូលជិត ៦៤ លានដុល្លា ដោយមានការកើនឡើងរហូតដល់ ៤៤.៨ ភាគរយ នេះបើធៀបទៅនឹងរយៈពេលដូចគ្នាកាលពីឆ្នាំ ២០២២ ដោយមានទំហំទឹកប្រាក់ជាង ៤៤ លានដុល្លារ។
បើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជាដដែលបានឱ្យដឹងថា កាលពីឆ្នាំ ២០២២ កម្ពុជាបានរកចំណូលពីការនាំចេញកៅស៊ូធម្មជាតិ និងផលិតផលកៅស៊ូទៅកាន់ទីផ្សារអន្តរជាតិបានប្រមាណជា ៥៤១. ៦៦ លានដុល្លារ មានការកើនឡើង ២៨.៣ ភាគរយ នេះបើធៀបនឹងឆ្នាំ ២០២១។ហើយទីផ្សារសំខាន់ៗ ក្នុងការនាំចេញកៅស៊ូរបស់កម្ពុជា មានដូចជា ប្រទេសវៀតណាម ម៉ាឡេស៊ី ចិន សិង្ហបុរី ជប៉ុន កូរ៉េ និងសហគមអឺរ៉ុប ជាដើម។
គួរបញ្ជាក់ផងដែរថា បច្ចុប្បន្ននេះប្រទេសកម្ពុជាមានផ្ទៃដីដាំកៅស៊ូសរុបទំហំ ៤០៤ ៥៧៨ ហិកតា ក្នុងនោះកៅស៊ូដែលអាចចៀរជ័របានមានផ្ទៃដីទំហំ ៣១៥ ៣៣២ ហិកតា ស្មើនឹង ៧៨ ភាគរយ និងផ្ទៃដីថែទាំមានទំហំ៨៩ ២៤៦ ហិកតា ស្មើនឹង ២២ ភាគរយ៕
ដោយ៖ សំណាង