ភ្នំពេញ ៖ អគ្គិភ័យបានឆាបឆេះហាងលក់គ្រឿងអលង្ការមួយកន្លែងកាលពីព្រឹកថ្ងៃទី២៦ ខែកក្កដា ឆ្នាំ២០២៣នេះ ស្ថិតនៅតាមបណ្តោយផ្លូវលេខ៣៦០ សង្កាត់បឹងកេងកងទី៣ ខណ្ឌបឹងកេងកង ។
យោងតាមរបាយការណ៍របស់សមត្ថកិច្ចបានឱ្យដឹងថា នៅមុនពេលកើតហេតុ មានប្រជាពលរដ្ឋបានរាយការណ៍ថា មានគ្រោះអគ្គិភ័យបានឆេះផ្ទះពលរដ្ឋមួយខ្នង ប្រភេទសំណង់ថ្មបេតុងប្រក់សង្ក័សី ទំហំ៤មx១៦ម ដោយម្ចាស់ផ្ទះមានឈ្មោះ ម៉ៅ តារា ភេទប្រុស អាយុ៤៥ឆ្នាំ មុខរបរលក់គុជខ្យង ត្រង់ចំណុចទីតាំងខាងលើ ដើម្បីសុំឱ្យសមត្ថកិច្ចប្រចាំបញ្ចាHotline117 នៃអគ្គស្នងការដ្ឋាននគរបាលជាតិជួយអន្តរាគមន៍ ។
ក្រោយពីទទួលបានដំណឹងនេះភ្លាម សមត្ថកិច្ចប្រចាំបញ្ជា117 ក៏បានបញ្ជាកម្លាំងជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញចេញរថយន្តពន្លត់អគ្គិភ័យជាច្រើនគ្រឿងដើម្បីទៅជួយអន្តរាគមន៍បាញ់ទឹកពន្លត់ និងប្រើប្រាស់រថយន្តពន្លត់អគ្គិភ័យចំនួន០៩គ្រឿង និងប្រើទឹកសរុបអស់ចំនួន០៣ឡាន ក៏រលត់ទៅវិញជាស្ថាពរនៅវេលាម៉ោង០៦ និង៣០នាទីថ្ងៃខែឆ្នាំដដែល ដោយមិនឆេះរាលដាល់ដល់ផ្ទះអ្នកជិតខាង និងគ្រោះថ្នាក់ដល់មនុស្សនោះឡើយ ។
ចំពោះមូលហេតុនៃការឆាបឆេះនេះ សមត្ថកិច្ចកំពុងស្រាវជ្រាវបន្ត ៕
ដោយ ៖ វិសាល