មុខសញ្ញាចាស់ទើបចេញពីពន្ធនាគារមិនរាងចាល ចេញធ្វើសកម្មភាពឆក់ចំនួន០២ដងទៀត ដោយឆក់ខ្សែក និងឆក់កាបូបជនរងគ្រោះនៅតាមដងផ្លូវទៀត ។ បន្ទាប់ពីទទួលបានពាក្យបណ្តឹងពីជនរងគ្រោះ សមត្ថកិច្ចបានធ្វើការស្រាវជ្រាវ ហើយឈានទៅចាប់ជនសង្ស័យបាន នៅថ្ងៃទី២៩ ខែកក្កដា ឆ្នាំ២០២៣ វេលាម៉ោង២៣ និង៤០នាទី នៅត្រង់ចំណុចផ្លូវលេខ១៧២ សង្កាត់ផ្សារថ្មីទី២ ខណ្ឌដូនពេញ រាជធានីភ្នំពេញ។
បើតាមចម្លើយសារភាពរបស់ជនសង្ស័យប្រាប់សមត្ថកិច្ចជំនាញ នៃនាយកដ្ឋាននគរបាលព្រហ្មទណ្ឌបានឱ្យដឹងថា បន្ទាប់ពីរូបគេចេញពីពន្ធនាគា រូបគេបានធ្វើសកម្មភាពចេញឆក់ទៀតដោយករណីទី០១គឺនៅថ្ងៃទី២៥ ខែកក្កដា ឆ្នាំ២០២៣ វេលាម៉ោង១០ និង០០នាទី ដោយបានធ្វើសកម្មភាពឆក់ខ្សែកពីបុរសម្នាក់កំពុងឈប់ម៉ូតូខ្ចប់គុយទាវ បានសម្រេច នៅចំណុចមុខហាងគុយទាវអង្គរជុំ ស្ថិតនៅផ្លូវលេខ៥៩២ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។ បន្ទាប់ពីបានធ្វើសកម្មភាពរួច ក៏បានយកខ្សែក ទៅលក់នៅតូប០១កន្លែង ក្នុងផ្សារឈូកមាស បានប្រាក់ចំនួន ៧៥០ដុល្លារ។ហើយករណីទី០២គឺនៅថ្ងៃទី២៧ ខែកក្កដា ឆ្នាំ២០២៣ វេលាម៉ោង២២ និង៣០នាទី បានធ្វើសកម្មភាពឆក់កាបូបស្ពាយពីនារីរងគ្រោះកំពុងជិះម៉ូតូបានសម្រេចនៅចំណុចផ្លូវលេខ២៦៥កែងផ្លូវលេខ១៥០ ក្នុងសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។ ចំពោះ សម្ភារៈក្នុងកាបូបមានទូរស័ព្ទម៉ាក អាយហ្វូន ១៣ ពណ៌ផ្កាឈូក បន្ទាប់មករូបគេក៏បានយកទៅលក់ឱ្យបុរសម្នាក់ បានប្រាក់ចំនួន ៤៨០ដុល្លារ។
ជនសង្ស័យឆក់កាបូប និងខ្សែកជនរងគ្រោះនៅតាមដងផ្លូវយ៉ាងសកម្ម ដែលសមត្ថកិច្ចចាប់បាននេះមានឈ្មោះ សុវណ្ណ ឧត្តមរង្សី ហៅ តួ ភេទប្រុស អាយុ២៨ឆ្នាំ ជនជាតិខ្មែរ ដោយរូបគេធ្លាប់ជាប់ពន្ធនាគារម្តងមកហើយ ក្នុងករណីឆក់កាបូបពីជនរងគ្រោះតាមផ្លូវដូចគ្នា។
បន្ទាប់ពីចាប់ខ្លួន សម្ភារដកហូតបានរួមមាន៖
-ម៉ូតូម៉ាកហុងដាឃ្លីក ពណ៌ខ្មៅ ពាក់ស្លាកលេខ ភ្នំពេញ1KA-2583(មិនប្រក្រតី)។ហើយកម្លាំងជំនាញបាននាំជនសង្ស័យខាងលើ ទៅចង្អុលបង្ហាញតូប ០១កន្លែង ក្នុងផ្សារឈូកមាស ដែលខ្លួនបានយកខ្សែក ទៅលក់ ដើម្បីកម្លាំងជំនាញទៅដកហូតខ្សែក យកមកប្រគល់ជូនជនរងគ្រោះវិញ ប៉ុន្តែខ្សែកខាងលើ ត្រូវបានម្ចាស់តូបរំលាយជាដុំលោហៈធាតុ ពណ៌លឿងបាត់ទៅហើយ តែម្ចាស់តូបបានប្រគល់ដុំលោហៈធាតុ ពណ៌លឿង ទម្ងន់ចំនួន០១តម្លឹង មកឱ្យសមត្ថកិច្ចដើម្បីចាត់ការតាមនីតិវិធីច្បាប់។
បន្ទាប់ពីធ្វើការដកហូតរួចមក កម្លាំងជំនាញនាយកដ្ឋាននគរបាលព្រហ្មទណ្ឌបានធ្វើការប្រគល់ដុំលោហៈធាតុ ពណ៌លឿង ទម្ងន់០១តំឡឹងនោះទៅឱ្យជនរងគ្រោះវិញ។
បច្ចុប្បន្នជនសង្ស័យ និងវត្ថុតាងខាងលើ ការិយាល័យកំពុងបញ្ជូនទៅអយ្យការអមសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី៕
ដោយ៖ ឧត្តម
