បន្ទាប់ពីគ្រួសារមួយមានគ្នាបួននាក់ត្រូវបានសម្លាប់ដោយការបាញ់ផ្លោងដោយកាំភ្លើងធំរបស់រុស្ស៊ីនៅតំបន់ Kherson ភាគខាងត្បូងអ៊ុយក្រែន ប្រធានាធិបតីអ៊ុយក្រែន លោក Volodymyr Zelensky បានប្រកាសពីការសងសឹក។ដោយគាត់បាននិយាយនៅក្នុង Telegram របស់គាត់កាលពីថ្ងៃអាទិត្យម្សិលម៉ិញនេះថា គ្រឿងបរិក្ខារ ឃ្លាំង ស្ពាន Kerch និងកន្លែងផ្សេងៗជាច្រើនទៀតត្រូវបានបំផ្លាញ ដែលទាំងអស់នេះបង្ហាញថា យើងនឹងមិនទុកឱ្យឧក្រិដ្ឋកម្មណាមួយរបស់រុស្ស៊ីដោយគ្មានការឆ្លើយតបនោះឡើយ។
នៅក្នុងតំបន់ Kherson តែមួយ អាជ្ញាធរបាននិយាយថា មានមនុស្ស 7 នាក់បានស្លាប់ និងប្រហែល 15 នាក់ផ្សេងទៀតបានរងរបួស។
យោងតាមអាជ្ញាធរអ៊ុយក្រែនបានឱ្យដឹងថា នៅក្នុងភូមិ Shyroka Balka កាំភ្លើងធំរបស់រុស្ស៊ីបានសម្លាប់មនុស្សចំនួន 5 នាក់ ក្នុងនោះគ្រួសារមានសមាជិក 4 នាក់ រួមទាំងឪពុក ម្តាយ កូនប្រុសអាយុ 12 ឆ្នាំ និងទារកអាយុប្រហែល 3 សប្តាហ៍ផងដែរ កាលពីព្រឹកថ្ងៃអាទិត្យ។
លោកZelensky បាននិយាយនៅក្នុងសុន្ទរកថារបស់គាត់ថា តំបន់នេះត្រូវបានបាញ់ផ្លោងចំនួន 17 ដងដោយការបាញ់របស់កងទ័ពរុស្ស៊ីនៅអំឡុងពេលថ្ងៃ។ រដ្ឋបាលយោធាក្នុងតំបន់បានប្រកាសថ្ងៃកាន់ទុក្ខក្នុងតំបន់កាលពីនៅថ្ងៃច័ន្ទនេះ។
រុស្ស៊ីបានធ្វើសង្រ្គាមចូលទៅឈ្លានពានអ៊ុយក្រែនអស់រយៈពេលជាង ១៧ ខែមកហើយ។អង្គការសហប្រជាជាតិបានចុះបញ្ជីជាផ្លូវការនូវជនស៊ីវិលជាង 9,000 នាក់ដែលត្រូវបានសម្លាប់នៅក្នុងជម្លោះ ប៉ុន្តែចំនួនពិតប្រាកដគឺប្រហែលជាច្រើនជាងនេះ៕
ប្រភព៖ A News
ប្រែសម្រួលដោយ៖ វាសនា