ប្រធានាធិបតីអាមេរិក លោក Joe Biden កាលពីថ្ងៃអង្គារ បាននិយាយថា លោកនឹងធ្វើដំណើរទៅកោះហាវ៉ៃ ក្នុងពេលឆាប់ៗនេះ បន្ទាប់ពីភ្លើងឆេះព្រៃ ដែលបានសម្លាប់មនុស្សយ៉ាងតិច ៩៩នាក់។ លោក Biden បាននិយាយនៅអំឡុងពេលសុន្ទរកថានៅទីក្រុង Milwaukee រដ្ឋ Wisconsin ថា “ភរិយារបស់ខ្ញុំ Jill និងខ្ញុំនឹងធ្វើដំណើរទៅ Hawaii ឱ្យបានឆាប់តាមដែលអាចធ្វើទៅបាន” ។
លោក Biden បានសន្យាផ្តល់ជំនួយសង្គ្រោះគ្រោះមហន្តរាយរបស់រដ្ឋាភិបាលដល់ប្រជាជននៅរដ្ឋហាវ៉ៃពីរថ្ងៃបន្ទាប់ពីភ្លើងបានឆេះឡើងកាលពីសប្តាហ៍មុន។ ប្រធានាធិបតីសហរដ្ឋអាមេរិកក៏បាននិយាយផងដែរថា លោកបានទូរស័ព្ទទៅអភិបាលរដ្ឋហាវ៉ៃលោក Josh Green នៅថ្ងៃអង្គារនោះដែរ ដើម្បីពិភាក្សាអំពីការស្តារឡើងវិញនៃកោះហាវ៉ៃបន្ទាប់ពីភ្លើងឆេះព្រៃដ៏សាហាវបំផុតក្នុងមួយសតវត្សរ៍ដែលបានឆក់យកជីវិតមនុស្ស 99 នាក់ ។
ភ្លើងឆេះព្រៃបានផ្ទុះឡើងកាលពីថ្ងៃទី 8 ខែសីហា នៅកន្លែងជាច្រើននៅលើកោះ Maui និងកោះ Hawaii ជិតខាងដែលមានឈ្មោះដូចគ្នាទៅនឹងរដ្ឋរបស់សហរដ្ឋអាមេរិក។ ទីក្រុងតូចមួយនៃ Lahaina នៅលើកោះ Maui ដែលមានប្រជាជនចំនួន 13,000 នាក់ មុនពេលគ្រោះមហន្តរាយនេះ ត្រូវបានរងផលប៉ះពាល់យ៉ាងខ្លាំង។ ផ្លូវជាច្រើននៅទីនោះមើលទៅដូចជាតំបន់សង្គ្រាម។ កណ្តាលទីក្រុង Lahaina ត្រូវបានបំផ្លាញទាំងស្រុង ខណៈដែលកងកម្លាំងសង្គ្រោះបន្ទាន់កំពុងបន្តស្វែងរកអ្នកបាត់ខ្លួន។ ប៉ូលីស Maui បាននិយាយថា គិតត្រឹមព្រឹកថ្ងៃអង្គារ ចំនួនអ្នកស្លាប់ដែលបានបញ្ជាក់គឺមានចំនួនរហូតដល់ទៅ ៩៩ នាក់ ៕
ប្រភព៖ A News
ប្រែសម្រួលដោយ៖ វាសនា