ពីម្សិលម៉ិញមានករណីកាប់សម្លាប់ប្រពន្ធព្រោះតែភ្លើងប្រចណ្ឌ នៅថ្ងៃនេះមានករណីចាក់សម្លាប់ប្រពន្ធ។បើតាមសេចក្តីរាយការណ៍ពីអ្នកយកព័ត៌មានរបស់យើងបានឱ្យដឹងថា បុរសម្នាក់ជនជាតិវៀតណាមម្នាក់ បានចាក់សម្លាប់ប្រពន្ធរបស់ខ្លួន មួយកាំបិត ហើយរត់គេចខ្លនបាត់ស្រមោលតែម្តង។ ហេតុការណ៍នេះបានបង្កការភ្ញាក់ផ្អើលឡើងនៅវេលាម៉ោង១០ និង៣០នាទីព្រឹកថ្ងៃទី១៧ ខែសីហា ឆ្នាំ២០២៣ស្ថិតនៅតាមបណ្តោយផ្លូវបេតុង ក្នុងសង្កាត់ចាក់អង្រែលើខណ្ឌមានជ័យ រាជធានីភ្នំពេញ។
បើតាមប្រភពព័ត៌មាននៅកន្លែងកើតហេតុបានឱ្យដឹងថា ក្រោយពេលកើតហេតុភ្លាមៗស្ត្រីរងគ្រោះជាប្រពន្ធត្រូវបានបងប្អូនប្រជាពលរដ្ឋនៅក្បែរខាងនាំគ្នាដឹកយកទៅសង្គ្រោះបន្ទាន់នៅឯមន្ទីរពហុព្យាបាល មេឌ ១១៥ដែរ តែជាអកុសល ដោយសារតែស្ត្រីរងគ្រោះបានរងរបួសធ្ងន់ធ្ងរពេក ក្រុមគ្រូពេទ្យមិនអាចជួយសង្គ្រោះបាន ស្ត្រីរងគ្រោះក៏បានដាច់ខ្យល់ស្លាប់។
ភ្លាមៗនោះ សមត្ថកិច្ចជំនាញខណ្ឌ បានចុះទៅដល់ទីតាំងកើតហេតុ ព្រមទាំងបានហ៊ុមព័ទ្ធជុំវិញទីតាំងកន្លែងកើតហេតុ និងរាយការណ៍ទៅកាន់សមត្ថកិច្ចជំនាញផ្នែកកោសល្យវិច័យ នៃស្នងការដ្ឋាននគរបាលរាជធានីភ្នំពេញ ដើម្បីធ្វើការត្រួតពិនិត្យសាកសពផងដែរ៕
ដោយ៖ សំណាង