ប្រទេសអូស្ត្រាលីបានប្រកាសកាលពីថ្ងៃច័ន្ទម្សិលម៉ិញនេះថា ខ្លួននឹងបញ្ជាទិញមីស៊ីលឆ្លងទ្វីប Tomahawk ពីសហរដ្ឋអាមេរិក ដែលមានតម្លៃ 1.3 ពាន់លានដុល្លារ ដើម្បីបង្កើនសមត្ថភាពការពាររយៈចម្ងាយឆ្ងាយរបស់ខ្លួន។ យោងតាមសេចក្តីថ្លែងការណ៍របស់ក្រសួងការពារជាតិអូស្ត្រាលី រដ្ឋាភិបាលបានត្រៀមកញ្ចប់ថវិកាជាង 1.7 ពាន់លានដុល្លារសម្រាប់ការទិញប្រព័ន្ធសព្វាវុធដ៏មានឥទ្ធិពលបំផុត និងបច្ចេកវិទ្យាទំនើបបំផុតនេះ។
នៅក្នុងសេចក្តីថ្លែងការណ៍ដដែលបានបន្ថែមថា អូស្ត្រាលីនឹងក្លាយជាប្រទេសមួយក្នុងចំណោមប្រទេសចំនួនបីប៉ុណ្ណោះ ដែលមានសមត្ថភាពវាយប្រហាររយៈចម្ងាយឆ្ងាយ Tomahawk នៅពេលដែលខ្លួនទិញកាំជ្រួចធ្វើដំណើរច្រើនជាង 200 ពីសហរដ្ឋអាមេរិកសម្រាប់នាវាពិឃាត Hobart-class របស់ Royal Australian Navy ។ហើយកាំជ្រួចប្រឆាំងវិទ្យុសកម្មរយៈចម្ងាយឆ្ងាយជាង ៦០ គ្រាប់នឹងត្រូវទិញសម្រាប់ប្រើក្នុងយន្តហោះចម្បាំង Growler, Super Hornet និង F-35A ដែលមានតម្លៃសរុប ៤៣១ លានដុល្លារ។
គួរបញ្ជាក់ផងដែរថា អូស្ត្រាលីនឹងផ្តល់ថវិកាជាង ៥០ លានដុល្លារសម្រាប់បំពាក់រថពាសដែក Boxer ជាមួយនឹងកាំជ្រួចប្រឆាំងរថក្រោះ។ យោងតាមសេចក្តីថ្លែងការណ៍បានឱ្យដឹងថា ការបញ្ជូនកាំជ្រួចមីស៊ីល Spike ជាលើកដំបូងត្រូវបានគេរំពឹងថានឹងធ្វើឡើងនៅដើមឆ្នាំក្រោយ។
អូស្ត្រាលីកំពុងពិចារណាជម្រើសសម្រាប់ការផលិតមីស៊ីលក្នុងស្រុក សេចក្តីថ្លែងការណ៍បាននិយាយថា “ការទិញយកប្រព័ន្ធសព្វាវុធដ៏មានឥទ្ធិពល និងបច្ចេកវិទ្យាទំនើបបំផុតមួយចំនួនដែលកងកម្លាំងការពារប្រទេសអូស្ត្រាលីបានដាក់ឱ្យប្រើប្រាស់នឹងពង្រឹងសមត្ថភាពរបស់អូស្ត្រាលីក្នុងការកំណត់គោលដៅសត្រូវនៅចម្ងាយឆ្ងាយ” ។ អូស្ត្រាលីកំពុងធ្វើការលើការបង្កើតលទ្ធភាពសម្រាប់ការផលិតក្នុងស្រុក។ រដ្ឋមន្ត្រីការពារជាតិលោក Richard Marles បានសង្កត់ធ្ងន់លើភាពចាំបាច់សម្រាប់សមត្ថភាពដូចជាកាំជ្រួចវាយប្រហាររយៈចម្ងាយឆ្ងាយ និងអាវុធដឹកនាំផ្សេងទៀតនៅក្នុងកងកម្លាំងការពារអូស្ត្រាលី “ដើម្បីអាចទប់ទល់សត្រូវដែលមានហានិភ័យបន្ថែមទៀតពីឆ្នេរសមុទ្ររបស់យើង” ។ Marles បាននិយាយថា “យើងកំពុងវិនិយោគលើសមត្ថភាពដែលកងកម្លាំងការពាររបស់យើងត្រូវការដើម្បីទប់សត្រូវរបស់យើងដែលមានហានិភ័យបន្ថែមទៀតពីឆ្នេរសមុទ្ររបស់យើង និងរក្សាប្រជាជនអូស្ត្រាលីឱ្យមានសុវត្ថិភាពនៅក្នុងពិភពដ៏ស្មុគស្មាញ និងមិនច្បាស់លាស់ដែលយើងរស់នៅសព្វថ្ងៃនេះ” ។
ជាមួយនឹងការទិញមីស៊ីល Tomahawk អូស្ត្រាលីក៏នឹងចូលរួមជាប្រទេសទីបីនៅលើពិភពលោក បន្ទាប់ពីសហរដ្ឋអាមេរិក និងចក្រភពអង់គ្លេស ដើម្បីបញ្ចូលមីស៊ីលទាំងនេះនៅក្នុងឃ្លាំងអាវុធរបស់ខ្លួន។ កាលពីថ្ងៃទី17 ខែមីនា ដើមឆ្នាំនេះ ក្រសួងការបរទេសសហរដ្ឋអាមេរិកបានប្រកាសពីការយល់ព្រមសម្រាប់ការលក់មីស៊ីល Tomahawk ប្រហែល 220 គ្រាប់ទៅឱ្យអូស្ត្រាលី។ យោងតាមសេចក្តីថ្លែងការណ៍បានឱ្យដឹងថា មីស៊ីល Tomahawk នឹងយកទៅបំពាក់នៅនាវាមុជទឹកថ្នាក់រដ្ឋ Virginia ដែលអូស្ត្រាលីគ្រោងនឹងទិញក្រោមកិច្ចព្រមព្រៀង AUKUS ៕
ប្រភព៖ A News
ប្រែសម្រួលដោយ៖ វាសនា