ភ្នំពេញ ៖ សមត្ថកិច្ចនគរបាលខណ្ឌឫស្សីកែវបានបើកម៉ូតូប្រដេញ តាមចាប់ជនសង្ស័យកាច់សោករម៉ូតូ ២នាក់ ពីចំណុចរង្វង់កាំកូស៊ីតធី ផ្លូវ៥៩៨ ក្រុមទី១១ភូមិពោងពាយ សង្កាត់ទួលសង្កែទី២ ខណ្ឌឫស្សីកែវ និងឃាត់ខ្លួនបាន នៅសង្កាត់បឹងកក់២ កាលពីម៉ោង១ រំលងអាធ្រាត្រ ឈានចូលថ្ងៃទី០១ ខែកញ្ញា ឆ្នាំ២០២៣។
លោក ហ៊ាង ថារ៉េត អធិការនគរបាលខណ្ឌឫស្សីកែវ បានឲ្យដឹងថា ជនសង្ស័យ ទាំង០២នាក់ មានឈ្មោះ ចាន់ ពិសិទ្ធិ អាយុ២២ឆ្នាំ មុខរបរ សន្តិសុខ មានទីលំនៅផ្ទះលេខ០៣៥ ផ្លូវលំ ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ (មានសារធាតុញៀន) និងឈ្មោះ រិទ្ធ ហេង អាយុ២៥ឆាំ្ន មុខរបរមិនពិតប្រាកដ មានទីលំនៅផ្ទះគ្មានលេខ ផ្លូវបេតុង ភូមិបាគូ សង្កាត់បាគូ ខណ្ឌដង្កោ រាជធានីភ្នំពេញ (មានសារធាតុញៀន) ។ សំភារៈដែលសមត្ថកិច្ច ដកហូតបានរួមមាន៖ សោរខ្សៀលេខ៨ចំនួន០១។ ដែកសំប៉ែតចុងស្រូច ចំនួន០១។ ម៉ូតូ០១គ្រឿង និង ទូរសព្ទដៃ១គឿង។
លោក ហ៊ាង ថារ៉េត បានបន្តទៀតថា មុនពេលកើតហេតុ ជនសង្ស័យទាំង២នាក់ជិះម៉ូតូមួយគ្រឿងម៉ាក suzuki nex ពណ៌ស គោលបំណងលួចទ្រព្យសម្បត្តិប្រជាពលរដ្ឋ ពេលជនសង្ស័យជិះមកដល់ចំណុចខាងលើ ក៏ជួបកំលាំងសមត្ថកិច្ចល្បាតសង្ស័យត្រួតពិនិត្យឆែកឆេររកឃើញដែកសំប៉ែតចុងស្រួច (សោអក្សរT) ឧបករណ៍សម្រាប់ឆ្កឹះសោរម៉ូតូ នៅក្នុងហោប៉ៅខោជនសង្ស័យឈ្មោះ ចាន់ ពិសិដ្ឋ ដែលលាក់នៅក្នុងហោប៉ៅខោផ្នែកខាងឆ្វេង នៅពេលកំពុងបើកម៉ូតូប្រដេញឃាត់ខ្លួនជនសង្ស័យ បានយកសោរ គប់ មកលើសមត្ថកិច្ចទៀតផង។
បន្ទាប់ពីឃាត់ខ្លួជនសង្ស័យរួមនឹងវត្ថុតាងត្រូវបានសមត្ថកិច្ចយើងនាំមកអធិការដ្ឋានខណ្ឌឫស្សីកែវដើម្បីសាកសួរចាត់ការបន្តតាមនីតិវិធី៕
ដោយ៖ វិសាល