ក្រុមក្មេងទំនើងប្រុស ស្រីចំនួន៤៦នាក់ត្រូវបានសមត្ថកិច្ចនគរបាលនាំយកទៅសួរនាំនៅស្នងការដ្ឋាននគរបាលខេត្តបាត់ដំបង បន្ទាប់ពីក្រុម ទីទុយរាត្រីចរនេះ ប្រមូលផ្តុំគ្នាជាក្រុមជិះម៉ូតូយ៉ាងអនាធិបតេយ្យ ពពាក់ពពូននៅក្នុងក្រុងបាត់ដំបង។
ប្រតិបត្តិការបង្ក្រាបក្មេងទំនើងប្រុស ស្រីមួយហ្វូងធំនេះត្រូវបានធ្វើឡើងក្រោមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង បន្ទាប់ពីលោកបានចេញបញ្ជាយ៉ាងហ្មឹងម៉ាត់កាលពីថ្ងៃទី៨ខែកញ្ញាឆ្នាំ២០២៣កន្លងទៅនេះនិង ដោយមានការសម្របសម្រួលលើនីតិវិធីពី ឯកឧត្ដម កែវ សុជាតិ ព្រះរាជអាជ្ញា នៃអយ្យការអមសាលាដំបូងខេត្តបាត់ដំបងផងនោះ ។
នាវេលាម៉ោង០២ និង៣៧នាទីរំលងអាធ្រាត្រឈានចូលថ្ងៃទី១០ ខែកញ្ញា ឆ្នាំ២០២៣ ដោយក្នុងនោះ សមត្ថកិច្ចផែនការងារនគរបាលព្រហ្មទណ្ឌ ដែលមានលោកឧត្តមសេនីយ៍ត្រី លឹម ពុទ្ធីឡា ជាស្នងការរងទទួលផែន ក្នុងនោះលោកវរសេនីយឯក ឈឿង គឹមសុង ស្នងការរងដឹកនាំការិយាល័យនគរបាលព្រហ្មទ័ណ្ឌកម្រិតស្រាល មានលោកវរសេនីយ៍ឯក ចៀក ផានិន ជានាយការិយាល័យដឹកនាំកម្លាំងសហការជាមួយកម្លាំងនគរបាលក្រុងបាត់ដំបងដែលមានលោកវរសេនីយ៍ឯក ពេជ្រ សារ៉ែន ជាអធិការ ចុះប្រតិបត្តិការបង្ក្រាបក្រុមក្មេងទំនើង ប្រមូលផ្ដុំ បង្កភាពអនាធិបតេយ្យ ០១ ករណី និងបានធ្វើការនាំខ្លួនក្មេងៗទាំងនោះចំនួន៤៦ នាក់ ទៅកាន់ស្នងការដ្ឋានដើម្បីសាកសួរ ខណៈដែលក្មេងៗទាំងនេះ ប្រមូលផ្តុំគ្នាយ៉ាងពពាក់ពពូនតាមទីសាធារណៈ។
ក្រោយពីការសាកសួរសមត្ថកិច្ចបានធ្វើតេស្តទឹកនោមស្វែងរកសារធាតុញៀនក្នុងនោះមាន ក្មេងៗចំនួន ១៥ នាក់ មានផ្ទុកសារធាតុញៀនក្នុងខ្លួនផងដែរ។ចំពោះក្មេងៗដែលមានផ្ទុកសារធាតុញៀនសមត្ថកិច្ចបានបញ្ជូនទៅការិយាល័យប្រឆាំងបទល្មើសគ្រឿងញៀនចាត់ការបន្ត ។ចំណែកក្មេងៗដែលជិះម៉ូតូបង្កភាពអនាណាធិបតេយ្យ និង ខុសលក្ខណៈបច្ចេកទេស បានប្រគល់ឱ្យទៅការិយាល័យនគរបាលចរាចរណ៍ផ្លូវគោកចាត់ការបន្ត និងក្មេងៗដែលមិនមានពាក់ព័ន្ធនឹងបទល្មើសបានធ្វើការអប់រំឱ្យអាណាព្យាបាលមកធានាយកទៅលំនៅឋានវិញ ។
គួរបញ្ជាក់ផងដែរថា នៅក្នុងប្រតិបត្តិការបង្ក្រាបក្មេងទំនើងនេះ សមត្ថកិច្ចដកហូតបានវត្ថុតាងម៉ូតូចំនួន ២២ គ្រឿង បច្ចុប្បន្នការិយាល័យជំនាញកំពុងចាត់ការបន្តតាមនីតិវិធី៕
ដោយ៖ សំណាង
