វ៉ាស៊ីនតោន៖ ប្រធានាធិបតីអាមេរិក លោក Joe Biden កាលពីថ្ងៃព្រហស្បតិ៍ម្សិលម៉ិញ បានធានាដល់ប្រធានាធិបតីអ៊ុយក្រែន លោក Volodymyr Zelenskiy ថា ការគាំទ្រដ៏រឹងមាំរបស់សហរដ្ឋអាមេរិក សម្រាប់សង្រ្គាមរបស់គាត់ ដើម្បីវាយលុកការឈ្លានពានរបស់រុស្ស៊ី នឹងត្រូវបានរក្សា ទោះបីជាមានការប្រឆាំងពីសមាជិកសភាគណបក្សសាធារណរដ្ឋមួយចំនួនក្នុងការបញ្ជូនជំនួយរាប់ពាន់លានដុល្លារបន្ថែមទៀតក៏ដោយ។
លោក Biden បានប្រាប់ Zelenskiy បន្ទាប់ពីការពិភាក្សារយៈពេលពីរម៉ោងថា៖ «លោកប្រធានាធិបតី យើងនៅជាមួយអ្នក យើងនៅជាមួយនឹងអ្នក»។
Zelenskiy បានថ្លែងអំណរគុណដល់លោក Biden សម្រាប់កញ្ចប់ជំនួយយោធាថ្មី 325 លានដុល្លារនៃអាវុធ និងឧបករណ៍ការពារដែនអាកាស ដោយនិយាយថា “វាជាអ្វីដែលទាហានរបស់យើងត្រូវការនៅពេលនេះ” ។
គាត់បាននិយាយថា គាត់ និងលោក Biden បានយល់ព្រមលើជំហានជាក់លាក់ដើម្បីពង្រីកការនាំចេញគ្រាប់ធញ្ញជាតិពីអ៊ុយក្រែននៅពេលប្រឈមមុខនឹងការបិទផ្លូវរបស់រុស្ស៊ី និងភាពតានតឹងជាមួយប្រទេសជិតខាងប៉ូឡូញ។ គាត់មិនបានលម្អិតពីជំហាននោះទេ។
សំណើររបស់លោក Biden សម្រាប់ទឹកប្រាក់ចំនួន 24 លានដុល្លារបន្ថែមទៀតនៅក្នុងមូលនិធិអ៊ុយក្រែន ដើម្បីជួយចំណាយសម្រាប់វិស័យការពារជាតិ និងជំនួយមនុស្សធម៌របស់អ៊ុយក្រែនរហូតដល់ដំណាច់ឆ្នាំនេះ ត្រូវបានជាប់គាំង ដោយក្រុមគណបក្សសាធារណរដ្ឋដែលមាននិន្នាការរឹងរូសនៅក្នុងសភាតំណាងរាស្រ្តមិនយល់ស្រប។
លោក Biden បាននិយាយថា រថក្រោះ Abrams របស់អាមេរិកដំបូងគេនឹងត្រូវបញ្ជូនទៅអ៊ុយក្រែននៅសប្តាហ៍ក្រោយ។ដូចដែលយើងប្តេជ្ញាជួយអ៊ុយក្រែនការពារខ្លួន ឥឡូវនេះយើងក៏ប្តេជ្ញាជួយពួកគេឱ្យងើបឡើងវិញ និងកសាងឡើងវិញនាពេលអនាគត រួមទាំងការគាំទ្រកំណែទម្រង់ដែលនឹងប្រយុទ្ធប្រឆាំងនឹងអំពើពុករលួយ” ។
បន្ទាប់ពីស្វែងរកការគាំទ្រពីអន្តរជាតិនៅអង្គការសហប្រជាជាតិកាលពីថ្ងៃពុធ លោក Zelenskiy បានមកទីក្រុងវ៉ាស៊ីនតោនយ៉ាងប្រញាប់ប្រញាល់បំផុត ដើម្បីចូលរួមកិច្ចប្រជុំជាមួយមេដឹកនាំយោធានៅមន្ទីរបញ្ចកោណ។
ក្នុងការប្រកាសកញ្ចប់ជំនួយយោធាថ្មីចំនួន 325 លានដុល្លារសម្រាប់អ៊ុយក្រែន លោក Biden បានកោតសរសើរចំពោះភាពក្លាហានរបស់ប្រជាជនអ៊ុយក្រែន នៅពេលដែលគាត់ និង Zelenskiy បានជួបគ្នានៅការិយាល័យ Oval Office ។
រហូតមកដល់ពេលនេះ សហរដ្ឋអាមេរិកបានបញ្ជូនជំនួយផ្នែកសន្តិសុខ និងមនុស្សធម៌ប្រមាណ ១១៣ ពាន់លានដុល្លារទៅជួយរដ្ឋាភិបាលរបស់ Zelenskiy ចាប់តាំងពីរុស្ស៊ីបានឈ្លានពានក្នុងខែកុម្ភៈ ឆ្នាំ ២០២២៕
ប្រភព៖ Reuters
ប្រែសម្រួលដោយ៖ វាសនា
