កងកម្លាំងប្រដាប់អាវុធរបស់ក្រុមហាម៉ាស់ប៉ាឡេស្ទីនបាននិយាយកាលពីថ្ងៃច័ន្ទថា អ៊ីស្រាអែលកំពុងពន្យារពេលលើកិច្ចព្រមព្រៀងស្តីពីការដោះលែងចំណាប់ខ្មាំងអ៊ីស្រាអែលរាប់សិបនាក់ ជាថ្នូរនឹងការដោះលែងស្ត្រី និងកុមារប៉ាឡេស្ទីនដែលកំពុងត្រូវបានឃុំខ្លួននៅក្នុងពន្ធនាគាររបស់អ៊ីស្រាអែល។
នៅក្នុងសារខ្សែអាត់ អ្នកនាំពាក្យក្រុម Al-Qassam Brigades លោក Abu Obeida បាននិយាយថា អ្នកសម្របសម្រួលកាតាបានដឹកនាំកិច្ចខិតខំប្រឹងប្រែងដើម្បីដោះលែងស្ត្រី និងកុមារអ៊ីស្រាអែលចំនួន 100 នាក់ជាថ្នូរនឹងការដោះលែងកុមារប៉ាឡេស្ទីនចំនួន 200 នាក់ និងស្ត្រី 75 នាក់ពីពន្ធនាគាររបស់អ៊ីស្រាអែល។ លោកបាននិយាយថា ភាគីអ៊ីស្រាអែលបានស្នើសុំឱ្យមានការដោះលែងស្ត្រី និងកុមារដែលឃុំខ្លួននៅហ្គាហ្សា ប៉ុន្តែក្រុមហាម៉ាស់បានជូនដំណឹងដល់អ្នកសម្របសម្រួលថាក្រុមនេះអាចយល់ព្រមលើបទឈប់បាញ់រយៈពេលប្រាំថ្ងៃ នៅអំឡុងពេលដែលខ្លួនអាចដោះលែងអ្នកជាប់ឃុំចំនួន 50 នាក់នៅក្នុងតំបន់ហ្គាហ្សា ជាមួយនឹងលទ្ធភាព ដែលចំនួនដោះលែងអាចកើនឡើងដល់ 70នាក់ ។
លោកបានធ្វើការកត់សម្គាល់ថា អ៊ីស្រាអែលកំពុងពន្យារពេល និងព្យាយាមគេចពីការបង់ថ្លៃអ្វីមួយ ហើយកំពុងមិនអើពើនឹងជីវិតរបស់ពួកឈ្លើយសឹកនៅហ្គាហ្សា។ Abu Obeida ក៏បាននិយាយផងដែរថា ទាហានអ៊ីស្រាអែលស្ត្រីម្នាក់ ដែលត្រូវបានចាប់ធ្វើជាចំណាប់ខ្មាំងត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលកាលពីប៉ុន្មានថ្ងៃមុននេះ។ ក្រោយមកក្រុមរបស់លោកបានចេញផ្សាយវីដេអូអំពីការចាប់ខ្លួននាង។ កាតាកំពុងដឹកនាំកិច្ចប្រឹងប្រែងសម្របសម្រួលរវាងក្រុមហាម៉ាស និងអ៊ីស្រាអែល។
កងពលតូចរបស់ Al-Qassam បាននិយាយមុននេះថា ពួកគេកំពុងចាប់មនុស្សពី ២០០ ទៅ ២៥០ នាក់ជាចំណាប់ខ្មាំង រួមទាំងទាហានអ៊ីស្រាអែល និងជនស៊ីវិលផងដែរ។ ខណៈពេលដែលការវាយលុករបស់អ៊ីស្រាអែលលើតំបន់ហ្គាហ្សាស្ទ្រីបបានឈានចូលដល់ថ្ងៃទី ៣៨ ប្រជាជនប៉ាឡេស្ទីនយ៉ាងតិច ១១.១៨០ នាក់ត្រូវបានសម្លាប់ ក្នុងនោះមានស្ត្រី និងកុមារជាង ៧.៧០០ នាក់ និងជាង ២៨.២០០ នាក់ផ្សេងទៀតបានរងរបួស។ នេះបើយោងតាមតួលេខចុងក្រោយរបស់អាជ្ញាធរប៉ាឡេស្ទីន។ ហើយអគាររាប់ពាន់រួមទាំងមន្ទីរពេទ្យ វិហារអ៊ីស្លាម និងព្រះវិហារក៏ត្រូវបានខូចខាត ឬបំផ្លាញផងដែរ នៅក្នុងការវាយប្រហារតាមផ្លូវអាកាស និងជើងគោកឥតឈប់ឈររបស់អ៊ីស្រាអែល ទៅលើតំបន់GAZA ចាប់តាំងពីខែមុនមក៕
ប្រភព៖ A News
ប្រែសម្រួលដោយ៖ វាសនា
