ភ្នំពេញ ៖ បុរសម្នាក់បានដួលបោកក្បាលទៅនឹងផ្លូវបណ្តាលឱ្យស្លាប់ភ្លាមៗនៅនឹងកន្លែង ខណៈបើម៉ូតូយ៉ាងលឿនមិនប្រយ័ត្នជ្រុលទៅបុករថយន្តបើកបត់ចូលក្នុងបុរីភ្នំពេញផាក ចំពាក់កណ្តាលពេញទំហឹង។ហេតុការណ៍គ្រោះថ្នាក់ចរាចរណ៍នេះបង្កឲ្យមានការភ្ញាក់ផ្អើលឡើងកាលពីម៉ោង ៩ និង៣០នាទីយប់ថ្ងៃទី១៤ខែវិច្ឆិកា ឆ្នាំ២០២៣ ស្ថិតនៅតាមបណ្តោយផ្លូវជាតិលេខ 6 ចំណុចមុខបុរីភ្នំពេញផាក សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។

សមត្ថកិច្ចបានឲ្យដឹងថា សពជនរងគ្រោះមានឈ្មោះ ទួត សុភ័ស្ស អាយុ៤០ឆ្នាំ មុខរបរ អ្នកបើកឡាន រស់នៅភូមិព្រែកអំពិល ឃុំព្រែកអំពិល ស្រុកខ្សាច់កណ្តាល ខេត្តកណ្តាល។

ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្តម៉ាក TUCSONពណ៌សពាក់ស្លាកលេខ ភ្នំពេញ2BM-1900 បើកបរដោយបុរសម្នាក់ មិនស្គាល់អត្តសញ្ញាណ ធ្វើដំណើរតាមបណ្តោយផ្លូវជាតិលេខ ៦ ក្នុងទិសដៅពីត្បូងមកជើង ខណៈបើកមកដល់ចំណុចកើតហេតុ ក៏បានបត់ឆ្វេងឆ្លងផ្លូវចូលក្នុងបុរីភ្នំពេញផាក ពេលឆ្លងដល់ពាក់កណ្តាលផ្លូវ ស្រាប់តែមានបុរសម្នាក់បើកម៉ូតូម៉ាកMSLAZ ពណ៌ខ្មៅ ពាក់ស្លាកលេខ កណ្តាល 1AM-6803 ជិះតាមបណ្តោយផ្លូវជាតិលេខ៦ ក្នុងទិសដៅពីជើងមកត្បូងក្នុងល្បឿនយ៉ាងលឿន ពេលជិះមកដល់ចំណុចកើតហេតុចាប់ហ្រ្វាំងមិនទាន់ ក៏ជ្រុលទៅបុកចំពាក់កណ្តាលរថយន្តពេញទំហឹង បណ្តាលឲ្យដួលបោកក្បាលស្លាប់នៅនឹងកន្លែងកើតហេតុភ្លាមៗ។ ចំណែកអ្នកបើកបររថយន្តត្រូវបានសមត្ថកិច្ចឃាត់បានភ្លាមៗ យកទៅប៉ុស្តិ៍នគរបាលរដ្ឋបាលសង្កាត់ព្រែកលៀប ដើម្បីសួរនាំបន្ត។

រថយន្ត និងម៉ូតូត្រូវបានសមត្ថកិច្ចយកទៅរក្សាទុក នៅខាងការិយាល័យចរាចរណ៍ជំនាញផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំឲ្យភាគីទាំងសងខាងដោះស្រាយគ្នានៅពេលក្រោយ៕

 

ដោយ៖ វិសាល