ក្រសួងការបរទេសអ៊ីស្រាអែលបានច្រានចោលដំណោះស្រាយមួយកាលពីថ្ងៃពុធម្សិលម៉ិញ ដែលត្រូវបានអនុម័តដោយក្រុមប្រឹក្សាសន្តិសុខអង្គការសហប្រជាជាតិដែលបានអំពាវនាវឱ្យ “ពង្រីកការផ្អាកមនុស្សធម៌ និងច្រករបៀង” នៅក្នុងតំបន់ហ្គាហ្សា។ នៅក្នុងសេចក្តីថ្លែងការណ៍មួយដែលត្រូវបានដកស្រង់ដោយកាសែត Haaretz បានឱ្យដឹងថា “មិនមានកន្លែងសម្រាប់ការផ្អាកមនុស្សធម៌បន្ថែមនោះទេ” ដរាបណាចំណាប់ខ្មាំងត្រូវបានចាប់ខ្លួនដោយក្រុមហាម៉ាសប៉ាឡេស្ទីន។
បេសកជនរបស់អ៊ីស្រាអែលប្រចាំអង្គការសហប្រជាជាតិ លោក Gilad Erdan ក៏បានពណ៌នាសេចក្តីសម្រេចនេះថា “ផ្តាច់ចេញពីការពិត” ព្រោះថា ខ្លួនមិនថ្កោលទោសក្រុមហាម៉ាស ជុំវិញការវាយប្រហាររបស់ខ្លួនដែលបានវាយប្រហារលើអ៊ីស្រាអែលកាលពីថ្ងៃទី 7 ខែតុលា។ ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធបានអនុម័តសេចក្តីព្រាងដំណោះស្រាយមួយដោយអំពាវនាវឱ្យមាន “ការផ្អាក និងច្រករបៀងមនុស្សធម៌ជាបន្ទាន់ និងបន្ថែម” នៅទូទាំងតំបន់ហ្គាហ្សា។
ប្រទេសចំនួន 12 បានបោះឆ្នោតគាំទ្រដំណោះស្រាយដែលដឹកនាំដោយប្រទេសម៉ាល់តា ខណៈពេលដែលសហរដ្ឋអាមេរិក ចក្រភពអង់គ្លេស និងរុស្ស៊ីបានបដិសេធមិនចូលរួមបោះឆ្នោត។ ដំណោះស្រាយក៏អំពាវនាវឲ្យដោះលែងចំណាប់ខ្មាំងទាំងអស់ដែលត្រូវក្រុម Hamas ចាប់ឃុំខ្លួនជាពិសេសកុមារ។ អ៊ីស្រាអែលបានបើកការវាយប្រហារផ្លូវអាកាស និងដីដោយឥតឈប់ឈរលើតំបន់ Gaza Strip ចាប់តាំងពីមានការវាយប្រហារឆ្លងព្រំដែនដោយក្រុមតស៊ូប៉ាឡេស្ទីន Hamas កាលពីថ្ងៃទី ៧ ខែតុលា។
ការិយាល័យប្រព័ន្ធផ្សព្វផ្សាយរដ្ឋាភិបាលនៅហ្គាហ្សាកាលពីថ្ងៃពុធបានប្រកាសថា ចំនួនអ្នកស្លាប់ដោយសារការវាយប្រហារតាមអាកាសរបស់អ៊ីស្រាអែលលើតំបន់ហ្គាហ្សាស្ទ្រីបចាប់តាំងពីថ្ងៃទី 7 ខែតុលានោះមកបានកើនឡើងដល់ 11,500 នាក់ក្នុងនោះមានកុមារចំនួន 4,710 នាក់ និងស្ត្រីចំនួន 3,160 នាក់។ហើយចំនួននៃការស្លាប់ក្នុងចំណោមបុគ្គលិកពេទ្យបានឈានដល់ 200នាក់។សេចក្តីថ្លែងការណ៍បានបន្តទៀតថា បុគ្គលិកការពារជនស៊ីវិល ២២ នាក់ និងអ្នកកាសែត ៥១ នាក់ក៏ត្រូវបានសម្លាប់ដែរ ខណៈអ្នករបួសមានដល់ ២៩ ៨០០ នាក់ ក្នុងនោះប្រហែល ៧០ ភាគរយនៃពួកគេជាស្ត្រី និងកុមារ។ អគាររាប់ពាន់រួមទាំងមន្ទីរពេទ្យ វិហារអ៊ីស្លាម និងព្រះវិហារក៏ត្រូវបានខូចខាត ឬបំផ្លាញផងដែរ នៅក្នុងការវាយប្រហារតាមផ្លូវអាកាស និងជើងគោកឥតឈប់ឈររបស់អ៊ីស្រាអែល ទៅលើតំបន់GAZA ចាប់តាំងពីខែមុន។ យោងតាមតួលេខផ្លូវការ បានឱ្យដឹងថា ចំនួនអ្នកស្លាប់របស់អ៊ីស្រាអែល មានប្រហែល 1,200 នាក់៕
ប្រភព៖ A News
ប្រែសម្រួលដោយ៖ វាសនា
