ខេត្តកណ្ដាល៖ បើយោងតាមការបញ្ជាក់ពីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» បានឱ្យដឹងនៅយប់ថ្ងៃទី១៦ ខែវិច្ឆិកា ឆ្នាំ២០២៣នេះថា៖ មន្រ្តីជំនាញ ក.ប.ប. និងនគរបាលសេដ្ឋកិច្ច ស្ទាក់ចាប់បានបង្គាស្រស់ដឹកដោយរថយន្តទួរីសមួយគ្រឿងផ្ទុកនូវសារធាតុគីមីហាមឃាត់ ដែលធ្វើឱ្យប៉ះពាល់ដល់សុខភាពយ៉ាងធ្ងន់ធ្ងរ។
មន្រ្តីជំនាញ ក.ប.ប. សាខាខេត្តកណ្ដាល ដោយមានកិច្ចសហការជាមួយនគរបាលសេដ្ឋកិច្ច នាយប់ថ្ងៃទី១៦ ខែវិច្ឆិកានេះ បានស្ទាក់ចាប់រថយន្តដឹកគ្រឿងសមុទ្រមួយគ្រឿងជារថយន្តម៉ាកទួរីសផ្ទុកនូវបង្គាស្រស់ចំនួន ១២៤កេស ដែលស្មើនឹង ២,១៣០គីឡូក្រាមដើម្បីស្វែងរកសារធាតុគីមីហាមឃាត់។
ក្នុងប្រតិបត្តិការនោះ មន្រ្តីជំនាញបានរកឃើញសាធារតុគីមី Formolin និងមានចាក់ចាហួយ (CMC) ដែលសារធាតុទាំង២ខាងលើនេះធ្វើឱ្យប៉ះពាល់សុខភាពអ្នកប្រើប្រាស់យ៉ាងធ្ងន់ធ្ងរ និងខុសច្បាប់ដែលមានចែងជាធរមាន។
គួរបញ្ជាក់ផងដែរថា ចំពោះបង្គាទាំងអស់មន្រ្តីជំនាញបានដកហូតយកទៅកម្ទេចចោលភ្លាមៗ និងធ្វើការពិន័យទៅតាមនីតិវិធីបន្តទៀត៕
ដោយ៖ វិសាល